تخاريف بهاء ..!!

تخاريف بهاء ..!!

تعالى نقف قدام شباك التذاكر .. هنقف ساعتين كده .. وماله .. هنوصل للشباك في الاخر يعني والوقفة تستحق والله .. مش هتلاقي تذكرتين غير في اخر مكان في المكان – تيجي ازاي دي – وماله .. كل ده عادي يعني انت مش متعود عالطوابير برضه .. مفيش مصري يا ابني لم يتعامل مع الطوابير والا تسحب منه الجنسية فورا ..

انت مش رايح تحضر اي عرض ولا رايح اي مكان عادي كده .. دي ولا فقرة الساحر ولا فقرة الدب الي راكب العجلة .. دي فقرات خاصة جدا جدا ..

هتقف قدام البوابة ساعة .. عينك مركزة على يافطة نيون بتنور وتطفي ومكتوب عليها بخط لعبي كده مش ماسك نفسه

" مرحبا بكم في اللا لا لاند "

اول ما تدخل هذا المكان البديع .. الحياة هتختلف تماما .. هتلاقي كمية كبيرة ومتنوعة من الطراطير والزمامير والشخاليل .. هتلاقي يفط منورة بتقولك ادخل يمين ... وراها يفط بتقولك ادخل شمال .. لحد ما في الاخر هتلاقي يافطة عليها واحد مطلعلك لسانه بيقولك (ضحكت عليكي يا ابلتي )

هو في حد يصدق يافطة جوه اللا لا لاند يا صاحبي !! انت عبيط في ودانك برضه ..

هذا المكان عزيزي الزائر هي نتاج لواحد وتلاتين سنة من الافكار الخزعبيلة والهري المتواصل والطرق اللولبية في التعامل مع خلق ربنا داخل رأس الحاج احمد بهاء .. الدماغ الي عايشة في اللا لا لاند

ما تستغربش .. انت لوحدك هتفهم كل حاجة بعدين ..

تعالى نبص على عرض السرعة ده .. العرض ده عزيزي حصري فقط عندنا وتتشرف بيه ادارة اللا لا لاند ..العرض ده بقاله اتناشر سنة وشوية شهور عندنا كده .. هتقولي ازاي في عرض لشخص واحد بيقول بابا وماما وجدو وصاحبي واخويا واختي وبنتي ويفصل ويهنج ويشتغل تاني في دقيقة واحدة بس .. هقولك يعني هو في حد يصدق ان بني ادم عادي من كوكبنا الاخضر بياكل ويشرب ويلبس وينام ويصحى وياكل ويشرب ويكلم ثلاثة اصحابه في التليفون وينزل ويشتري سجاير ويقعد يتكلم معاك في ست مواضيع مختلفة ويروح يخلص خمس مشاوير ويرجعلك تاني وكل ده في ساعة زمن بس !!

هيحصل فين الكلام ده غير مع الكابتن بهاء جوه اللا لا لاند الي في دماغه دي ..

طيب الاغرب بقه ان ده بيحصل لمجرد ان مفيش حد يزعل منه .. ولا حد يبقى محتاجه في اي حاجة ولو كانت هابلة .. تخيل .. او والله ده بيحصل في اللا لا لاند بتاعت كابتن بهاء بس !!

هتقولي دي عادي في كتير كده .. ماشي .. سيبك من عرض السرعة يا عم الاور .. تعالى اتفرج معايا على عرض الساحر والمحفظة الصديقة .. مستغرب .. هقولك انا .. قرب هنا بس عشان الدخول محدود بالعدد حسب مزاج الكابتن صاحب اللا لا لاند .. انت بس قرب وقول للكابتن انك فلست بس او محتاج اي مساعدة مادية او عينية .. هتلاقي الساحر طلعلك من المحفظة ذهب وياقوت ومرجان واكل وشرب وشاي وحاجة ساقعة وسجاير كمان – دا لو ليك فيها – وكل ده انك لمجرد بس قولت يا عم الساحر انك على وشك الافلاس ومحتاج مساعدتك .. هو في كده يا جدعان .. والله لو هتاخد حتى اخر مليم في جيبه .. والله بيديهولك بنفس راضية .. ده بسكويت يا جدعان

هتقولي برضه عادي في ناس كتير كده .. هلم لساني – الزفر مؤخرا – عنك وهقولك تعالى ندخل العرض ده..ده عرض اخوك الصغنن حلاوة .. وهو عبارة عن لعبة صغننة كده تقرب منها وتقولها انا محتاجك في خدمة يا حلاوة .. هتلاقي اللعبة بقى عندا ست ايدين وتسع ودان وخمستاشر رجل وكلهم بيتحركوا في نفس الوقت بدون اي تفكير عشان يساعدوك في خدمتك ايا كانت صعوبتها .. حتى لو هنجت اللعبة منك سبع تمن مرات واضطريت تعيد الطلب تاني .. هترجع تاني تعمل كل ده لحد ما تطمن ان مصلحتك قضيت وخدمتك انجزت ..

الجميل بقه ان اللعبة دي سايلنت .. ايوه يا اخويا محدش هيعرف انت قولتلها ايه وعملت معاها ايه وهي عملت معاك ايه .. حتى لو البعيد شردة ولسانك اتزحلق منك واتظفلط بكلمتين هنا وهنا وقعدت تسيح وتقول عمل معايا وسوى معايا .. برضه هو مش هيفتح بقه .. ولا هيأمم على كلامك ولا هيعترض ..سايلنت يا ابني .. سايلنننننننننننننت ..

هتقولي وايه يعني انا اعرف بتاع تلاتة اربعة بيعملوا كده .. هقولك يا راجل اجري بقه ما تقرفناش..وبعد ما اتحول عليك واهدى هقولك عارف في ايه هنا بقه في اقسام اللا لا لاند العادية .. اه عادية بالنسبة للكابتن بهاء .. تخيل لو لقيت المتعة والضحك والرجولة والهزار وشبيك لبيك والجليتور الي بين ايديك .. والكابتن بهاء صاحب ومبتكر اللا لا لاند دي مهموم ومديون وتعبان وظروفه مقندلة وحالته النفسية في الارض .. وعنده بيت وعيال ودنيا .. وفوق دماغه جبل لو شاله اربع رجالة هيقعوا .. ورغم كده يا اخي لا مكتئب ولا قرفان ولا زعلان .. بيضحك ويهزر .. ويزينب –دي من فعل الزينبة وده اوبشن هايل في اللا لا لاند ما يعرفش فايدته كتير – ويشجع ويساعد .. ويشتغل .. ويقف جنبك .. ويبقى اكتر من اخوك الي خلفوه امك وابوك..ويشاركك فرحك وهمك وحزنك .. ويقف جنبك في الواجب حلو او وحش .. ويبقى صاحب واخ وام وخال وعم ويشيل الهم .. ويعمل معاك حاجات عمرك ما تتخيل ان اخوك الي من لحمك ودمك ممكن يعملها !!

تخيل بقه كمان لو بيستحمل رزالتك .. وقلة ذوقك في بعض الاحيان .. وزعيقك وعلو صوتك من غير سبب ويقابل كل ده بإبتسامة طفولية جميلة .. تخيل لما تلاقيه بيجري ورا احلام حياته بمنتهى الاصرار عشر سنين رغم كل المعوقات الي لو وقفت في طريق اي حد هتحوله فورا الى كلب اعور حزين .. تخيل لا بيقصر ولا بيتأخر !!

سكت ليه يا نجم .. مش مصدق القدرة الغريبة على قلب الهم لضحك و هزار وزينبة ولا الصبر ولا شيال الحمول ولا ...  العشر سنين ؟؟!!

طيب كمان جوه اللا لا لاند هتلاقي شوية حاجات كده .. اه يعني ماهو لازم يبقى في اراء غريبة شوية ..بس برضه كلها وجهات نظر .. حتى يا سيدي لو متناقضة شوية بالنسبة ليك .. بس كل واحد دماغه مريحاه..ما تجربش تقنعه عشان هو غبي شوية في موضوع الاقناع ده .. ما تجربش تخش جواه وتعرف حاجة عشان لو مش عايز يقولك مش هيقولك .. اه .. ما تجربش ترغي معاه في فلوس .. هتلاقي نفسك طلعت بره الى ارض الواقع المؤلم .. ومنع عنك دخول اللا لا لاند الى الابد .. الى الابد ..

ساكت ليه ..؟؟ عرفت انا ليه مسميها اللا لا لاند .. لان الواقع دلوقتي زفت .. الواقع الي حول اغلب الناس لمنتفعين ومصلحجية .. والي ما تحتجش وشه بكرة تحتاج قفاه .. الواقع ده مش موجود هنا .. احنا مبسوطين بوجودنا جوه اللا لا لاند بتاعت اخونا بهاء ..

وبما ان ده عمره ما بيحصل يا صديقي مؤخرا .. وبما انه خلاص بقه نوع من انواع التخاريف ..

عشان كده الحاجات دي كلها على بعضها اسمها ..

تخاريف بهاء !!

اهداء خاص جدا

الى احمد بهاء .. والله العظيم انا فخور اني اعرفك واني في يوم من الايام بقيت صاحبك .. ومسيري هعرف اردلك ولو جزء صغير من الي عملته معايا – ولو انه كتير اوي يا صاحبي –

وكفاية بقه عشان كده هعيط