طبعا اول ما قريت العنوان حسيت انه مثير وعدائي ومسروق
من فيلم عربي و ....... بلا بلا بلا – هراء يعني لا مؤاخذة – بس من الاخر هو ده
العنوان المناسب الي جه في دماغي ومش هغيره عشان دعاة الابتكار والتجديد والتنوير
وشغل الهشتكة ده .. اديني في الهايف وانا احبك يا فننس ده شعارنا هنا من اول سطر
لحد اخر سطر
طيب .. نخش في الموضوع .. في الشوية الجايين دول هنعرف
شوية افراد وشخصيات من عصابة وليد طلعت..طبعا هنبدأ بزعيم العصابة والقائد ورمانة
الميزان ومانويل جوزيه العصابة .. هو مين ؟؟ .. وليد طلعت طبعا ما تبطل غباوة يا جدع
.!!
المواصفات الشكلية مش هتهمك كتير – الا لو كنتي من اعضاء
نادي كيوت مان – ساعتها انصحك تدوري على اكونته على الفيس بوك وتخلصينا .. اما لو
كنت مهتم تعرف المواصفات الشخصية والنفسية .. احب اعرفك عليها هنا
الراجل ده عصبي حبتين .. حمقي تلات حبات .. نمكي في
تفاصيله الشخصية اربع حبات ونص .. بس فيه ميزة جميلة اوي .. ومهمة اوي .. الراجل
ده قائد بطبعه .. لا مش قائد وبس .. ده طبق اسلوب جميل في قيادة هذه العصابة
الجميلة وهو لسه لا يعرف حاجة عن علم الادارة ولا عن مقومات المدير الناجح في التكعيب
المتوسط للمؤسسات ذات البتنجان المخلل – اي كلام من بتاع كورسات اليوم الواحد ده –
الراجل ده خدته فطرته السليمة ودماغه الي اتعود يشغلها
بشكل مختلف ناحية اسلوب اسمه القيادة الجماعية للمنظومة .. زي الاسلوب كده الي
بيستخدمه بيل جيتس .. اسلوب قعدة العرب زي ما واحد صاحبنا بيحب يسميه
المختصر المفيد .. الاسلوب ده بيعتمد اساسا على اخضاع كل
مهارات وقدرات كل الافراد من اول قائد المنظومة لحد اصغر عيل فيها لتقوية وتنمية
المنظومة ومحاولة اقناع افراد المنظومة بتصوراتك وقراراتك بشكل ديمقراطي لتحويلها
الى اهداف مشتركة وليس تصورات قيادية فقط وهو ما يعرف في علم الادارة بأسلوب
القائد الناعم
Smooth Boss Method
سامع صوتك بيقول " ايه الكلام المجعلص ده ما تكلمنا
شعبي كده عشان نفهم " اقولك ان مثلا انت عندك فكرة وعايز تطبقها وتحت ايدك
مجموعة مختلفة الاشخاص والنفسيات .. قدامك طريقتين .. يا تقول بصريح العبارة انا
دماغي فيها كذا وهنعمل كذا وكذا .. وساعتها احب ابشرك انك هتفشل فشل ذريع لان اغلب
الي هينفذوا الكلام ده هيعملوه كل واحد بطريقته لحد ما المركب تغرق وتسمعني سلام
اني اغرق اغرق .. يا تعمل زي ما اخونا لالو عمل
هتلم افراد عصابتك المهمين او الافراد المفتاحيين الي
بيسموهم في علم البناء الاداري (الكي بيرسونس) .. ودول ليهم طريقة في الاختيار ..
لازم يكون كل واحد فيهم له دور مميز ويكونوا اقرب منك بشكل يومي من افراد عصابتك
الاغراء وهتعمل معاهم قعدة برين ستورمينج .. او عصف الافكار عشان اخوانا بتوع
اللغة .. وتقعدوا تتناقشوا وتتخانقوا وكل واحد يطلع برأي وتختلفوا وتتفقوا وفي
الاخر توصولوا لي اتفاق نهائي محدد الادوار للكل ..يعني كل واحد هيبقى عارف هو
بيعمل ايه وده اهميته ايه بالنسبة للمنظومة كلها .. وفي الاخر لازم تضغط اوي على
نقطة ان كل تفصيلة ولو كانت صغيرة هتفرق اوي اوي في الهدف الي (احنا) عايزين نحققه
.. لازم الهدف يكون احنا والطريقة احنا والوسيلة احنا ..
طيب استفدت انا ايه بقه يا عم الحاج لما عملت كده ؟؟
اولا : وصلت للناس رسالة ان مفيش انفراد برأي ولا شغل
ديكتاتورية جوه اللعبة .. احنا اتفقنا كلنا ووصلنا كلنا للطريقة دي وللاسلوب ده ..
مش انا وصلت لا احنا وصلنا
ثانيا : الفكرة تحولت من مخ الفرد بشكل لطيف وناعم الى
قلب المجموعة كلها .. وده هيخلي كل افراد المجموعة المختلفين اساسا في كل شئ من
اول الشخصيات لحد الادوار والافكار يشتغلوا على الفكرة كأنها فكرة كل واحد فيهم
لوحده وبمنتهى الحب . وانت عارف القاعدة الاساسية " كله بالحب يا صاحبي
"
ثالثا : الطريقة دي هتديك فرصة تصنف المجموعة كويس ..
مين ينفع دوره يبقى دائم واساسي ومين دوره يبقى فرعي وغير مهم وغير ضار في نفس
الوقت .. صحيح مش هتنجح من اول محاولة في كده .. بس بعد كده هتعرف كويس اوي مين
بيحب المنظومة دي فعلا وعايزها فعلا .. ومين عايز المنظومة دي وسيلة لهدفه هو
الشخصي..وساعتها هتعرف تقسم دنيتك وبيتك جوه عشان تعرف مين ياخد الدور المهم ..
عشان ما يجيش حد في النص ويخلع وتلبس انت اسود يا معلم ..
طيب الي حكيتهولك ده عمله شاب عمره 21 سنة وطالب في كلية
هندسة ما درسش في حياته اكتر من فيزيا وكيميا في ثانوية عامة .. واحتراق وثيرمو
وتبريد وتكييف .. ولما حتى درس تنظيم صناعي – مادة سخيفة كده ومفتعلة- ما كانش حد
فيها بيهتم بأساسيات الادارة .. يعني عمل ده بفطرة سليمة وبنظرية تحترم جدا
استخدم مخه .. فهم هو عايز ايه وحدد كويس هو بيحلم بأيه
وحط خط لسقف طموحه رايح فين ..وده كان سبب اساسي في ان العصابة او المنظومة او
المجموعة – سميها زي ما تحب مش هتفرق- وصلت لاحتران وحب واعجاب الناس .. حتى لو
كانت فريق مسرح هواة افراده طلبة جامعة !!
نيجي بقه للاشخاص المفتاحيين او الكي بتوع الي احنا
قولنا عليهم انفا – حلوة انفا دي – واذا كنا هنرغي عن الاشخاص دول بس فا دا مش
معناه ان الباقي تحصيل حاصل .. مفيش فرد في اي منظومة تحصيل حاصل يا صاحبي .. اصغر
مسمار رابط اصغر ترس مهم عشان المكنة تخش الخدمة وتفضل شغالة ..
ملحوظة : عرض الافراد دول هيبقى بسميات ابتكرها وليد
نفسه في مشهد هزلي كوميدي في مسرحية من تأليفه شخصيا .. بس سبحان الله .. لقيت
المسميات دي بجد مناسبة جدا جدا جدا .. وسامحنا بقه يا عم على الاقتباس ده
ملحوظة تانية : تتعدد الاسامي لكن الدور يبقى ثابت ..
المنظومة الكويسة ما بتقفش على حد على فكرة..
رقم 1 : الخشن
الخشن ده غالبا بيبقى المكلف بالادوار القيادية الصعبة
.. الادوار الي محتاجة تطبق الجزء الاول من المقولة الشهيرة (لازم تضرب وتلاقي) ده
بقه الي بيبقى مسئول عن الضرب .. شوية حزم .. شوية انضباط كتير والتزام اكتر
..شوية عصبية تعدل اي حد يفكر يخرج عن الخط .. وده احتكاكه بيبقى اكتر مع الافراد
.. بيبقى برة لعبة الحاجات المساعدة عشان يفضي دماغ زعيم العصابة من الجو المدرسي
بتاع فين استيكتي وانا هلبس ايه وهاكل ايه
رقم 2 : الحنيين
ده بقه الي بيلاقي .. ما هو لازم يبقى في صدر حنين عشان
يلم ورا عمنا الخشن .. شوية حنية مع شوية هزار وضحك وجو اسري اخوي كده عشان الجو
يلطف .. وده غالبا بيبقى مهم عشان النفسيات ما تتعقدش وعشان العملية مش طالبة قفش
رقم 3 : رساوة
الاخت رساوة بتبقى قائدة الجناح النسائي في العصابة ..
وهي مسئولة عن النواحي النسائية الداخلية – تنظيم وقيادة بقية الاخوات في العصابة
- .. وعن النواحي الخارجية – مع المدامات بتوع رعاية الشباب وشؤون الطلاب الخ
الخ-غير طبعا تنظيم النواحي المادية وظبط الاداء الفلوسي جو العصابة عشان العملية
ماتخرمش
رقم 4 : عبقرينوووو
ده بقه المخ الحلو الجميل .. ده الي بيبص للفكرة من
زاوية خيالية خزعبلية جهنمية .. ومالوش في التنفيذ بقه وازاي تتعمل وهتكلف ايه لان
ده مش شغله ومش دماغه .. وده دايما بيبقى اكثر من شخص وبيبقى مهم جدا جدا في مرحلة
عصف الافكار اياها .. ومرحلة الحاجات المساعدة زي الغنا والدعاية والموسيقى وتسويق
الفكرة واللاذي منه ده
رقم 5 : السميييع
ده هو العنصر الي ممكن نسميه (ام شحاتة اللتاتة) ده
العنصر الاقرب من قعدات افراد العصابة الجانبية وده العنصر الي بينور اللمبة
الحمرا لما النفسيات تتعب .. او لما افراد العصابة يبقى عندهم مشاكل نفسية مستخبية
جوه جوه..ده بقه هو الي بيعرف يخش جوه جوه ويعرف كل حاجة من مجرد كلمة اتقالت او
بصة مش ولا بد محدش بياخد باله منها
رقم 6 : المستر مسيو
لما الفكرة بقه تحلو كده وتخش الفرن وتخرج للاكيلة ..
لازم يبقى في مدرس فاهم كويس هو بيعمل ايه عشان يعرف يوصل الفكرة لافراد العصابة
.. الراس دي هتحولها من مجرد فكرة لواقع وحاجة ملموسة .. الدور ده دايما بيتوزع ما
بين زعيم العصابة نفسه وما بين ناس تانية فاهمة شغلها وعارفة هي بتعمل ايه في قلب
المنظومة
رقم 7 : كازانوفا .. نوفا
ده بقه النجم
المحبوب .. المحبوب اوي من الجميع جوه وبره العصابة .. تقدر تقول عليه وسيلة
اساسية للم شمل العصابة .. لازم يبقى كوول .. جديد .. طاقق .. وكل حاجة هو بيعملها
بتتعمل تاني من افراد العصابة الي مالهمش شخصية محددة من الي فاتوا دول .. تقدر
تقول عليه .. تلفزيون العصابة ووزير اعلامها
رقم 8 : العنتيل
العنتيل ده بقه شخصية مش موجودة في المشهد على المسرح يا
عزيزي .. دي الشخصية الي مفيش حد من برة العصابة اصلا بيعرف عنها اي حاجة غير
الاسم والشكل .. لكن ده هو اللي بيسموه الهيفي ارم .. الدراع التقيلة اوي.دي
المساند الي بيقف عليها الكرسي .. بيعمل الادوار الصعبة الي في نفس الوقت اغلب
افراد العصابة ما بيعرفوش يعملوها .. زي بتاع المهمات في مواقع المباني .. ده بتاع
التنطيط .. المشتروات .. التنظيم .. ديكور ماشي .. اضاءة ماشي..ملابس ماشي ..
كواليس وتنظيم حركة برضه ماشي .. واذا حد خستع او خرج برة الخط .. تلاقيه بيسد
مكانه بمنتهى الاحترام والنظام من غير اي مناقشة .. ده الدراع الي بيسند التل قبل
ما يختل يا صاحبي .. وده سبب اني ختمت بيه .. لان من غيره كل ده ولا له اي لازمة
ولا ينفع ببصلة
طبعا في الاخر ما ينفعش نقفل ونمشي من غير ما امارس
هوايتي المفضلة في اني اديك الزتونة .. يا تحطها حلقة في ودانك يا ترميها في صفيحة
حياتك من غير اي تفكير وتريح مخك وتفكك من ميسره ورغيه
لو كل واحد فينا فكر هو ايه وعرف قدراته ايه واختار
مكانه جوه المنظومة دي ورضي بيه واشتغله بذمة وحب..لو كل قائد في البلد دي او مدير
او مشرف فكر في الناس الي وراه وفي المنظومة دي تكبر وتعمر ازاي ..
لو كل واحد فينا فكر في العصابة قبل ما يفكر في نفسه ..
كانت كل منظومة في البلد دي نجحت وكبرت ..
زي ما نجحت .. عصابة وليد طلعت
ليست هناك تعليقات:
إرسال تعليق