ملاحظات مواطن
عادي على المسودة النهائية للدستور
نخش في الموضوع .. الطريقة هنا
هتبقى عرض المادة او جزء من المادة برقمها
في المسودة النهائية الي اقرتها التأسيسية وشوية ملاحظات بالبلدي كده ممكن تفهم
ببساطة ايه سبب الاعتراض .. ومالناش دعوة ان كان رئيس الجمهورية راجل طيب ولا راجل
مصلي ولا راجل محترم .. دا دستور يابا مش لعب عيال
مادة (11)
فيما معناه ان الدولة هنا حقها تاخد اي اجراء قانوني او
اقتصادي او عقابي عشان ترعى الحاجات دي ..ويعني ايه ترعى الدولة الاداب ؟؟ يعني
ممكن بكرة الدولة تعملي هيئة رعاية الاداب او شرطة المستوى الرفيع للتربية بنص
قانون ويبقى صحيح دستوريا
مادة (14)
المادة زي الفل لحد ما جت جملة
لا يستثنى منه الا بقانون .. يعني لو طلع قانون يرفع الحد الاقصى لموظفين الحكومة
مليون جنيه مثلا ولا هنعرف نفتح بقنا ولا بنص كلمة !! ومن اهم مطالب الثورة حد
ادنى وحد اقصى..ومفيش حاجة اسمها استثنا
مادة (24)
بداية مبشرة لقانون التأميم
الجديد .. يعني ايه تنزع للمنفعة العامة ووفقا لقانون ؟؟ يعني قانون تأميم وكله
للمنفعة العامة .. وفرضا الي بيحقق المنفعة العامة دي راجل محترم .. مين يحدد
التعويض العادل .. وعادل وفقا لنظر مين ؟؟
مادة (29)
برضه مادة مطاطة زي الي قبلها ..
ويعني ايه تأميم ممتلكات ؟؟ ومين يطلع القانون .. واذا جه مجلس الشعب والرئيس مثلا
مثلا من التيار الليبرالي وما عجبهمش اتنين تلاتة رجال اعمال اخوان وسلفيين يطلعوا
الصبح قانون تأميم لممتلكاتهم – دا مثلا مثلا –
مادة (35)
يعني تتاخد على القسم الساعة 6
بالليل وتتحجز لحد 6 الصبح على ما حد يقولك سبب انت محجوز ليه وبعدين تقعد لحد 6
بالليل تاني على ما في نيابة تعبرك .. ولأننا في مصر المحروسة وشرطتها المحروسة ..
اعتبر نفسك اعترفت بكل حاجة قبل ما النيابة تشوف طرف جزمتك – اذا فضل عندك جزمة –
دا بيفكرني بفيلم اللعب مع
الكبار .. ما هو ممكن المتهم يدخل ياخد الطريحة المظبوطة ويخش ياخد المكياج التمام
ويطلع قدام الكاميرا عامل كده هو (ابتسامة عريضة )
مادة (49)
بالرغم من ان المواد الي قبلها
حلوة وامورة ومقبولة نوعا – لاحظ انا مش صحفي – لكن المادة دي بقه مش نازلالي من
زور .. مطاطة كده وبرضه تحت قانون – لسه ما اتوجدش – ومحدش عارف مين هيحطه والضابط
بتاعه ايه ؟؟
مادة (56)
يعني حتى مش هاين عليهم يخلوا
المصريين في الخارج (حوالي 10 مليون مواطن ) يبقى ليهم حق دستوري انهم يشاركوا في
انتخابات واستفتاءات .. كله على هوى الملايكة الطيبين اعضاء مجالس النواب والشيوخ
مادة ( 61)
محدش يسألنا على حاجة قبل عشر
سنين ها .. احنا مش هنغلط غلطة النهضة والميت يوم تاني ..
مادة (63)
لو الي فات ده مش مرفوض المادة
دي مادة كلها ثغرات ومنيلة بنيلة .. اولا العمل يتفرض جبرا بقانون ..يعني عايز
اعمل مشروع سخرة هعمله ومحدش ينطق .. هعمل قانون اضراب – دي نكتة بجد – يخلي الاضراب
سبت واربع وجمعة .. ويبقى مافيهوش اي تعطيل للمصلحة .. امال يبقى اضراب ازاي ؟؟ ..
والناس تاخد حقوقها السلمية من الحكومة ازاي ؟؟
مادة (70)
المادة دي مطاطة التنيين .. واول
مادة مافيهاش كلمة وينظمها القانون .. مين هيحدد الاعمال الي تناسب عمر الطفل ولا
لا .. انا شخصيا شايف ان العيل يشتغل تباع على ميكروباص دي مش مناسبة بس ده يتعارض
مع 5 مليون سواق ميكروباص في مصر !!
مادة (81)
رجعنا للمادة بتاعت وترعى الدولة
.. يعني مارس حقوقك بس بما يراعي الاداب العامة الي انا كدولة هحددها حسب توجهاتي
الفكرية والدينية مش حسب ضوابط وحاجات واضحة
مادة (84)
علل ؟؟؟
مادة (96)
ايوه الي هي ايه بقه ؟؟؟؟ يعني
ايه احوال مشترط فيها اغلبية خاصة ؟؟ نجيب بقه نماذج حلول من كارفن وطيبة عشان
نعرف ايه هي الاحوال ؟؟
مادة (102)
دي بقه مادة ماتشدش ما تشديش
انتي .. يعني لو مجلس النواب كله اخوان .. ومجلس الشورى كله ليبراليين ويساريين ..
مفيش قانون في البلد هيتعمل .. ده مش عايز قوانين لده وده مش عايز قوانين لده ..
يقوم الشعب يتخنق ويخرج في مظاهرات تقول لرئيس الجمهورية حل المجلسين وخلصنا ..
وبعدين ايه لازمة مجلس الشورى اصلا ؟؟ فا بدل ما الغيه اقوم اكبر صلاحياته !!!!!!!
غير ان المادة دي بتتعارض مع
النص في مادة (103)
الي فاهم يفهمني بقه عشان
الدستور ما ينفعش يبقى مايع وفيه مادتين مش مروقين مع بعض كده
مادة (134)
احاااااااااااااااازم .. ابسط يا
عم محدش هيسألك تاني اذا كانت امريكاوية ولا لا .. واحتياطي برضه احسن الشاطر
تطلعله ام سعودية ولا البلتاجي تطلعله ام سورية ..
طيب انا لو من حازم بعد
الاستفتاء ده لو الدستور اتقال عليه نعم اطعن في انتخابات الرياسة واعيدها تاني ..
مادة (173)
رئيس الجمهورية هو الي بيصدر
القرار بناء على ترشيحات وبس .. يعني مش ملزمة .. يعني اعين انا والي مش عاجبه
يبقى يعتصم .. مش تصديق وبس يعني .. لا لا .. ده تعيييييين
مادة (176)
ايوه احنا بننتقم من الدستورية
الوحشة الكخة .. دلوقتي هما رئيس و 17 عضو .. يعني في 7 هيتزحلقوا مع النسمة منهم
تهاني وحاتم بجاتو .. لا يا جدعان دي بريئة خالص .. ان بعض الظن اثم ..
مادة (192)
طيب نبص بصة على قانون المجالس
الشعبية المحلية الحالي
مادة 145: يصدر بحل المجلس
الشعبي المحلي للمحافظة أو لغيرها من وحدات الإدارة المحلية قرار من مجلس الوزراء بناء
على ما يعرضه الوزير المختص بالإدارة المحلية لأسباب تقتضيها المصلحة العامة ويقدرها
مجلس الوزراء.
مادة 146: يشكل في القرار
الصادر بحل المجلس الشعبي المحلي مجلس مؤقت بناء على اقتراح المحافظ المختص ويجب أن
يضم تشكيله عدداً كافياً من قيادات التنظيمات المحلية ويتولى المجلس المؤقت مباشرة
اختصاصات المجلس المنحل بالنسبة للمسائل الضرورية والعاجلة حتى يتم تشكيل المجلس الشعبي
المحلي الجديد ويجب إجراء الانتخابات لتشكيل هذا المجلس الجديد خلال الستين يوماً التالية
لصدور قرار الحل.
يعني انت انتخب .. واختار اعضاء
المجالس المحلية .. وانا كرئيس وزارة مش عجبني فا هقول حل ياد والمحافظ يعين تاني
بمزاجه
ازي الصحة ؟؟؟؟
مادة (198)
والمفروض اني اصدق ان القضاء
العسكري الي بيتبع القوات المسلحة اداريا والي بتعين قضاته مستقل ؟؟!!
ويعني ايه الجرائم التي تضر
بالقوات المسلحة ؟؟ طيب انت عارف ان الاعتداء على ضابط قوات مسلحة (حتى ولو برة
الخدمة ) تعتبر جريمة تضر بالقوات المسلحة وهيبتها (ودي تهمة سهل تلبسها لو ضابط
جيش ضربك في اشارة واضطريت انك تردله الضرب ) .. يعني المحاكمة امام القضاء العسكري تبقى بالكيف
وبالمزاج وحسب القانون الي هتحطه القوات المسلحة ولازم جملة مطاطة (ويبين اختصاصات
القضاء العسكري الاخرى )
امال حكم عسكر ايه الي انتهى يا
معلم ؟؟
مادة (202)
اه مستقلين فعلا ورقابيين فعلا
.. ايه الفرق كده عن دستور 1971 وتعديلات مبارك .. يعني ايه هيئة مستقلة ممكن
تراقب انفاق مؤسسة الرئاسة يعينها رئيس الجمهورية ؟؟ وطبعا احنا عارفين ان المجالس
بتقول اه وخلاص واخترناه وبايعناه وباذات الشورى الي عشر اعضاءه معينييييين ؟؟
مادة (215)
مين هيعينه ؟؟ ومعايير تعيينه
واختيار اعضاءه ايه ؟؟ وليه هنا مافيش جملة الا بقانون الشهيرة ؟؟ وايه هي قيم
المجتمع ومن وجهة نظر مين ؟؟
مادة (216)
انا كراجل نيتي وحشة شايف ان
المادة دي معناها ظبط اداء الصحف القومية والقنوات الحكومية ناحية بوصلة النظام ..
انا ماليش في النيات والقانون لا يحمي المغفلين
مادة (219)
مين اهل السنة والجماعة ؟؟ طيب
ما واحد صاحبنا بيقول على حسين يعقوب ومحمد حسان اهل سنة وجماعة يبقى فتاواهم يؤخذ
بيها في القوانين ؟؟
ونمشي تبع مذهب مين ؟؟ طيب ما
الجواز عند ابو حنيفة لا يبطل بعدم وجود ولي للبكر وعند الامام مالك يبطل الا في
وجود ولي ؟؟
مادة (224)
عشان الدستورية مايبقاش عندها
حجة بقه .. السلطة اهيه وانت نقي .. عايز طحينة ياخد .. عايز قوطة ياخد
مادة (230)
للاخ الي كان بيقولي نيته في
تحصين الشورى سليمة ..
مادة (231)
بالعند في الدستورية وبالعند في
العسكري .. سلطة سلطة بجد .. يعني ايه مستقلين يعملوا قايمة ؟؟ ويعني ايه احزاب
يرشحوا فردي ؟؟ ياريت الناس تقرا يعني ايه نظام انتخاب مختلط وبعدين تعرف ليه
الدستورية ابطلت قانون انتخابات مجلس الشعب وليه هو قانون اعور ..
مادة (233)
كنت سامع حد بيتكلم عن انتخابات
محليات قريبة ؟؟؟ اه انت .. النظام هيتعدل في 10 سنين .. يعني البس القانون الحالي
كويس واتغطى عشان ما تبردش ..
مادة (234)
ده
بقه اسمه تحصين التحصين .. الاثار دي تشمل القوانين والامتيازات والاقالات
والتعديلات على قوانين .. يعني احنا لابسين كل القرف الي حصل من 11 فبراير والى
يومنا هذا بالعافية وكله دستوري
في
النهاية يا صاحبي دي وجهة نظري الشخصية .. لو كنت من الي ايدوا الثورة دي من اولها
ومشيت معاها من اول يوم احب اقولك ان النتيجة الصحيحة للثورة هي دستور صح .. مفيش
حاجة اسمها نص حل .. ومفيش حاجة اسمها المجمل حلو والباقي كام مادة مش حلوين
الي
مش عاجبه مادة زي الي مش عاجبه عشرين .. دي طريقة الاستفتاء ..
واوعى
تقول انا مالي بالصحفيين ولا بالتأميم ولا بالمحاكمات العسكرية .. الي بيطول غيرك
يا صاحبي بكرة هيطولك
والسلام
ختام ..
ليست هناك تعليقات:
إرسال تعليق