الزمان : شهر اغسطس 2004
المكان : ساقية الصاوي
الحدث: نتيجة مهرجان الساقية المسرحي
عارف يعني ايه ثلاثين بني ادم قاعدين منتظرين نتيجة .. مش نتيجة ثانوية عامة ولا كلية ولا نتيجة انتخابات الرياسة .. لا نتيجة عرض مسرحي كان بالنسبة ليهم حلم لازم يتحقق
لو كنت من هارموني ارجع معايا بالذاكرة لورا شوية – مارس 2003 بالتحديد – اما لو كنت مش هارموني وما تعرفهمش .. ارجع معايا برضه انت خسران ايه !!
في مارس 2003 قررت ادارة جامعة حلوان البارة الغاء مهرجان المسرح الجامعي عشان امريكا قررت غزو العراق ودي حاجة بصراحة زودت كرهي لأمريكا .. يعني تيجوا على اخر سنة ليا في الجامعة واول عرض مسرحي عملاق بالشكل ده وبنحضرله من صيف 2002 وتقولي نلغي عشان امريكا مزاجها مش رايق وقررت تنكد على صدام عيشته !!
اتخرجت .. وقعدت في بيتنا شوية حلوين .. وصحيت في يوم من النوم على تليفون بيقولي تعالى يا عم انت الكلية عندك بروفا !!
بروفا ازاي يا وليد وانا خريج .. هنتصرف يا ميسره .. طيب ولما انفع في دور ولا حاجة هظهر على المسرح ازاي وانا خريج .. يا عم قولتلك هنتصرف بطل هري ..
ويشاء السميع العليم عزيزي القارئ الصبور الحنين انك تقف ياد يا ميسره على مسرح الكلية تاني .. وانك ياد يا ميسره تروح تعرض ليلتين في ساقية الصاوي وانت لسه خارج من مستشفى كوبري القبة العسكري وضغطك 160 على 110 عشان تخرج من الجيش .. ويشاء السميع العليم انك تدخل مهرجان الساقية المسرحي وتعرض ليلة الصالة مافيهاش مكان لرجل .. لا مفيهاش مكان لصباع حتى ..
ارجع معايا تاني قدام بقه .. ايوه بص في الوشوش دي كده .. اه ده مش ممثل معانا دا ايمن صاحبنا .. وده مش ممثل دا بهاء صاحبنا .. ودي وده ودي .. كل دول مش ممثلين يا جدعان دول اصحابنا ..
طيب تفتكر ليه الناس دي كانت معانا في كل حتة ؟؟!! تفتكر ليه كانوا قاعدين على اعصابهم زينا ومستنيين النتيجة؟؟!!
تفتكر ليه مثلا الناس الي كانت قاعدة دي ممثلين وشاعر وملحن ومهندس ديكور ومخرج كانوا على اعصابهم ؟!!
تفتكر ليه الفرحة الهيستيرية العارمة – شفت الكلام التقيل – لما كل واحد كان بيحط رجله على المسرح يستلم جايزة؟!!
انا هقولك يا معلم .. مش هقولك القلب والعقل – لأن الي في القلب في القلب - هقولك حاجة واحدة بس
كان في بني ادم ابن ناس ومحترم .. جاله الضغط واعصابه تعبت سنة ونص بيجهز .. استحمل كل السخافات والمعوقات .. كان قايم بدور حمض الكبريتيك المركز مع كل معادن هارموني لحد ما كل المعادن دي دابت في قلب الحمض وبقت سبيكة واحدة .. الفضل لله سبحانه وتعالى – احسن جمال يشوف الكلام ده ويزعل مني – ثم للبني ادم ده .. البني ادم الي عصبيته وقلبه على الشغل خلوه يتجنن ويكلم نفسه كل يوم عشان الديكور والاضاءة والموسيقى والممثلين .. وخناقات ومشاكل الممثلين جوه وبره المسرح .. وارهاق البيت والكلية .. ومشروع التخرج الي كان بيتنفضله يوم الاجتماع ..
لو كل واحد فينا كان بيهمه دوره وبس .. او دوره والمشهد الي هو فيه .. او يساعد ازاي بأي حاجة .. فدا عشان قائد المنظومة يا جدعان كان مخلص في كل حاجة بيعملها .. لما تحس انت يا بني ادم ان قائد المنظومة قلبه على الي بيحصل ده وانت قلبك في الثلاجة تبقى تستاهل الحرق ..
الروح يا جدعان مهمة مفيش كلام .. الروح بتخليك تتغاضى عن حاجات كتير وتطنش حاجات كتير عشان الكيان ده يفضل عايش .. الروح برضه لو راحت .. الكيان يقع .. بس عندي ليك سؤال بالله عليك
لو قائد الكيان ده عنده الروح .. و اعضاء الكيان ده بدأت تتسحب منهم الروح وبقى مكانها اشباح كتير اسمها الانانية والظهور والتفكير في ضوائق الامور – معلش اخر مرة اقول فيها كلام تقيل – يبقى الغلط والعيب على مين ؟؟!!
عايز يبقى عندك كيان محترم .. عايزه يعيش ويفضل عايش الى ان يرث الله الارض ومن عليها
اوعى تفكر غير في الكيان نفسه .. مهما كانت الاحباطات ومهما كانت المشاكل ومهما كانت العوائق .. فكر في الكيان وبس
عشان يوم ما تقف وقفة زي وقفة الساقية دي .. وتنجح هيقولوا هارموني – او ايا كان الاسم – هو الي نجح ويوم ما تفشل .. برضه هيقولوا الكيان كله فشل ..
لو كلامي ده بالنسبة ليك كلام انشا وموضوع تعبير ثانوية عامة انساه وكأنك ما قريتوش .. لكن لو حسيت بأي حاجة مفيدة منه .. يبقى حط اخر جملتين دول جوه عقلك واضربهم في الخلاط ..
واشرب وراهم بقين ميه عشان تهضمهم كويس ..
فاهم يا عم الحاج ولا نقول تاني ..؟؟
