صباح الفل

اصبح وافوق

اشعلل واروق  

الخبط واذوق

ولكن صباحي

صباح العسل

العيب مش عليك ..

الجملة دي بتركبلي العصبي بقه .. يعني ايه العيب مش عليك ..

يعني لما يبقى بني ادم عنده حاجة وعشرين سنة صايع وضايع ابوه تعب في تربيته بس البعيد جبلة ومصمم يجرب كل حاجة غلط وحرام عشان يشفي نفسيته المريضة يبقى بأمارة ايه تقوله بملو فمك وكلك اسى في لهجة تقريرية عبيطة (العيب مش عليك العيب على اهلك الي معرفوش يربوك ) !!!

هما اهله هيروحوا معاه المدرسة والجامعة و هيقعدوا بينه وبين اصحابه .. وهو فين .. شخصيته فين .. نتيجة تربيته المحترمة فين .. اه ساعات كتير اوي بتبقى التربية محترمة جدا بس الاستسهال بيخلي البني ادم يشوف الغلط السهل(تجارب حياتية عميقة ) ويشوف الصح الصعب (تزمت ونمكية وتعقيد) و (هجرب ازاي وانا ماشي على الصراط المستقيم) !!

لما واحدة انسة امورة تعرف شاب لطيف وابن ناس على قد حالهم وتقعد تجري وراه بطريقة (عيني فيه واقول اخيه) المشهورة الي بتوقع ثلاث اربع الرجالة وبعد كام سنة تكتشف انه غلبان وما حلتوش يجيب شبشب مش شقة وشبكة وعفش فا تقرر بمنتهى البساطة انها تفلسع وتتجوز اول عريس جاهز يخبط على باب الشقة .. وتقوله بمنتهى البراءة ودموع التماسيح بتغرق عينيها (العيب مش عليا العيب على الي ما عملش حاجة عشان يحافظ على انسانة بتحبه)!!! مع الكثير من الـ اهيئ اهيئ .. والسنيييييف  في المناديل (بيكتبوها كده في القصص )

هو يا حاجة يعني كنتي واخداه ابن مليونير واتفقر ولا بيضيع فلوسه في البورصة .. ما انتي راسية من الاول !!

خد بقه عندك الانقح .. لما يبقى في بني ادم حرامي وفاسد وظالم وراكب على قفاك بقاله ثلاثين سنة –ايوه ثلاثيييين سنة – وفجأة تقرر انت واقرر انا ويقرروا هما ان كفاية بقه عليك كده احنا استوينا يابا وبعدين تلاقي فلوطة طالعلك زي عفريت العلبة بيقولك (انتو جايين بعد ثلاثين سنة تتكلموا .. العيب مش عليه العيب عليكم عشان سكتوا ثلاثين سنة) دا بأمارة ايه بقه ؟؟!!!!!!!!!!!!!!!!!!!!! كفاية علامات تعجب بقه المقالة هتخلص

بس ارجع واقولكم العيب فعلا مش عليهم .. العيب على الي بيدور على اي حد يرمي عليه العيب .. العي على ثقافة رمي المسئولية

العيب على امثال شعبية زي ( يا فرعون ايش فرعنك .. قال مالقتش حد يصدني) مع ان عمر بن الخطاب وعمر بن عبد العزيز ماحدش صدهم ولا حد قالهم اعملوا وما تعملوش .. هما مجرد عرفوا الطريق والعدل طبقوه على نفسهم قبل غيرهم فا ما اتفرعنوش .. العيب على الي بيفكر دايما في ان الظروف منعتني و الجلالة خدتني والمجتمع ظالمني وعمره يا بيه ما فكر هو عمل ايه .. هو مستمتع بحياة المفعول به عشان بتريحه من التفكير ومن التعب ..مع ان كل انسان لو استخدم مخه شوية  وفكر صح وبطل يديله اجازة مفتوحة– وانا زيك بديله اجازة كتيييير – هيراجع نفسه الف مرة في قرارات كتير في حياته .. بدل ما يتجعص اوي ويقول بمنتهى الراحة (انا عداني العيب بقه كده)

احب اقولك يا سيدي .. العيب لا عداك ولا مش عليك .. العيب كله عليك ..

مرسالي ليكي

اصنعيني

اكتبي تاريخي

شكلي كل الحاجات الي في خيالك

انا ملك ايدك .. وطوع بنانك

مهما يشاور هتلاقيني

امسحي الي فات .. واكتبي كل الي جاي

انا بس عايزك ..

ع الي فات

تسامحيني

اللي رقصوا عالسلم !!

كان في مثل شعبي قديم بيقول ( اللي رقصوا على السلم .. لا الي فوق شافوهم ولا الي تحت سمعوهم) المثل ده في منتهى العبقرية لانه بيعبر عن حالة ناس كتير اوي مننا وهقولك ازاي حالا بس تعالى نجاوب على الاسئلة البسيتة دي

فاكر حضرتك لما كان حد بيسألك وانت صغير نفسك تطلع ايه ؟؟

لو كانت اجابتك ايامها انك عايز تطلع حاجة واحدة بس .. يعني لما حد يسألك تشد قوامك المفعوص وترد بصوت مسرسع (عايز اتلع زابت) او ترد بمنتهى الصراحة والوضوح والضحكة البلهاء ما بتفارقش وشك (مش عارف .. اطلع اي حاجة ) يبقى انت زي الفل .. فلة شمعة منورة على رأي صاحبنا اياه

لكن يا حلو لو كانت اجابتك انك عايز تطلع مهندس او دكتور او ضابط يبقى انت زيك زي الواد العسول بتاع اعلان مجدي يعقوب .. تقعد تسرح وتقول  (نسي نسي ) وبعدين بمنتهى البراءة تقول ( نسي اكول كوثري) يبقى انت رقصت على السلم من وانت لسه مفعوص اهبل .. شخصيا كنت دايما بقول يا مهندس يا ظابط .. مش عارف ايه العلاقة بس اهو ..

فاكر جنابك لما اتسألت نفس السؤال ده في ثانوية عامة بعد ما كل شيئن انكشفن وبان ؟؟

طبعا لو انت رقاص سلمي من صغرك يبقى هتفضل زي ما انت .. اول ما يجيلك استمارة التنسيق هتقعد تلزق في طوابع – اليومين دول بقه كله الكتروني ويخرب بيت جمال النت – هترسم مع ابوك مستقبلك الغبي هيرسى ازاي .. ويا سلام بقه لو ابوك كمان من الي رقصوا على السلم طول عمرهم يبقى هتقعد انت وهو تعملوا احلى شغل في الاستمارة .. الاول لو كنت علمي علوم هترص كليات طب وبعديها صيدلة وبعدين اسنان وبعدين علوم وبعدين تجارة – خلي بالك الرقص بدأ اهو – وبعدين اداب .. وبعدين حقوق.

وبرغم انك عارف ان مجموعك اهبل ولو لحقت تجارة يبقى فضل وعدل لكن انت مصمم تحط طب وصيدلة .. مع انك لو كنت حاببهم اوي كنت لازم تعمل اي حاجة عشان تدخل طب او تدخل صيدلة..هتقولي نظام التعليم غبي وكله صم وحفظ ومعرفش ايه .. هقولك الدون ميكيافيلي قال في كتابه الاشهر الامير : الغاية تبرر الوسيلة .. هي صحيح قاعدة حقيرة وعليها كلام بس انت غايتك نظيفة يبقى تعمل اي حاجة عشان توصلها .. النظام غبي خليك اغبى منه عشان تعمل الحاجة الي بتحبها يا اما تسلم امرك لله وتيجي الاستمارة ترزع فيها طوابع تجارة واداب وتخلص

اقولك على تجربة شخصية .. العبد لله ما رقصش على السلم بتاتا في الموضوع ده .. انا دخلت علمي رياضة عشان ادخل هندسة .. ما دخلتش قدرات عمارة ولا قدرات فنون لاني مش هدخل فنون جميلة او تطبيقية لو مجموعي ما جابش هندسة .. اذا ما فلحتش ودخلت هندسة هدخل اداب واتخصص علم نفس او ادب انجليزي او اعلام – ودي الهوايات الي انا بحبها يعني كنت هدرس هوايتي ما دام المجال الي بحلم بيه مش جاي – صحيح هنا في رقصة سلمية بسيطة بس اهو حاولت اكون واقعي عشان ما اتعبش

فاكر حضرتك لما كان والدك يخيرك بين حاجتين حلوين ؟؟

طبعا واساسي يا معلم عمرك ما كنت بتحسم قرارك .. هو الرقص على السلم يحلى غير هنا .. السينما ولا دريم بارك .. بيتزا هات ولا شاورمة ابو حيدر الي احلى من الحلاوة .. اجيبلك كوتشي اديداس ولا اجيبلك فانلة مانشستر يونايتد .. ما تقوليش اصل كنت باخد وقت افكر عشان معرفش ايه وعشان كده ما كنتش بحسم موقفي .. طيب نسيبنا من البطنيات –جمع بطني على رأي الست والدتي ادام الله بقاءها- والمظهريات – جمع مظهري مش محتاجة تفسير - ونتكلم في حاجات جد شوية

لما قالك والدك موبايل ولا كمبيوتر – والاتنين كانو بنفس السعر عشان احنا جيل فقري – اخترت ايه ؟ يا ترى قعدت تفكر انك محتاج تبقى بني ادم بتفهم في المستقبل الي هيفيدك بعد كده واننا هنوصل لمرحلة ان جاهل الكمبيوتر يبقى انسان غير مرغوب فيه في اي مكان شغل .. فكرت ان كل حاجة في الدنيا هتمشي كمبيوتر – لغاية دلوقتي لسه بس اهو بنزق – وانك لما تروح تشتغل في مكان هتلاقي نفسك بتتعامل مع الكمبيوتر اكتر ما بتتعامل مع زمايلك .. ولا فكرت ان المنظرة حلوة برضه .. وان الرنات الي على كمبوزر ال ستة تمانيتيين – حبيب قلبي – وانا لو حبيبك ما كنتش يوم تسيبني .. ده هيخليك شاب جامد و فحيت وفتيك وفــ .. – لا بلاش دي عيب – وانه رغم ان الموبايل مش ضروري وانك مش هتحتاجه اصلا لانك لا رجل اعمال ولا مدير عام شركة المراجيح المحدودة ليمتد .. ولا نائب وزير الموارد المائية .. بس انت عايز تعيش يومين وتسيبك من الكمبيوتر والهرتلة والنقر العفش بتاع اخونا مزاجنجي .. انت عايز تهيص يا عم

قرارك بتاعك وانت حر .. لو حسمته لاي من الاختيارين فا انت لعيب .. وتستاهل كل خير .. لكن لما تقرب من والدك وتحط عينك في الارض وكلك خشوع وهيبة ( الكمبيوتر احسن يا بابا ) وبعدين تخش على حمادة سلكة الي عنده معرض جنبكم وتميل عليه وانت بتبص يمين وشمال وتسأله الموبايل تقسيطه كام يا حمادة بيه ثم تذهب الى الست والدتك وعينك كلها خشوع وورع وتقول ( ماما ادفعي بس المقدم وانا هحوش الاقساط من مصروفي .. اشمعنى يعني حودة ابن عمتي – خد بالك من عمتي وتقل عليها كويس -  معاه موبايل ولا هو  امه يعني احسن من امي واكرم منها – فهمت ليه عمتي مهمة يا مقطف– !!

يعني رقصت يا معلم والسلم داب من رقصك .. انت عايز الاتنين .. عايز الكمبيوتر عشان تتعلم وتلعب وتتفرج وتنتت – النت يعني –  لما تبقى جوه البيت .. وعايز الموبايل عشان تتمنظر وتتفشخر وانت برة البيت

لما تيجي في رمضان يا اخويا تبقى عايز تسهر وتتفسح وتنبسط وفي نفس الوقت عايز مغفرة كاملة وجنة عرضها السماوات والارض .. طيب ازاي .. ربنا قالك ان ده مش هيحصل غير بالعبادة .. عايز تصلي فروض بس هتاخد نعيم على قدها .. بس عمرك ما هتبقى زيك زي الي واقف على رجليه ساعتين بيصلي تراويح وقيام وتهجد ومخلص لربنا في عبادته ومش عايز عرض الدنيا .. انت مصمم ترقص برضه..تمشي في وسط اصحابك تتكلم بقال الله وقال الرسول والغناء حرام والموسيقى حرام واول ما تعدي مزة حلوة تلف وشك ناحيتها 180 درجة وتقول بعلو صوتك ( يخرب بيتك حرام عليكم ) انت كده كبير الرقاصين يا معلم .. انت لا عارف تمشي على الصراط المستقيم اغلب الوقت ولا عارف تفضل على معصيتك اغلب الوقت .. لا عارف تستغنى عن البنوك وفوايدها وانت عارف انها حرام –على الاقل بالنسبة لغالبية العلماء -  بس في نفس الوقت لو واحد صاحبك خد قرض من بنك  - وساعات نفس البنك بتاعك -تكفر سيئاته وتقوله ازاي تقبل ربا الربا حرام .. مع ان الموضوع لو ربا يبقى قيسه عكس عكاس .. انت بتسيب فلوس للبنك يديلك عليها فايدة وهو بياخد من البنك وبيديله فايدة .. برضه مصمم ترقص على السلم يا صاحبي .. انت عايز تاخد كل مميزات الحرام وكل مميزات الحلال .. انت عايز تصلي ركعتين في اليوم وربنا يرزقك بكل الي بتتمناه .. مع ان الحديث الشريف بيقول ( احفظ الله يحفظك ) .. يعني أدي واجباتك ناحيته وبعدين استنى عطاياه مش العكس ..

طيب اقولك على الانقح بقه .. لما تبقى انت وانا وهو وهي وهما عاملين ثورة العالم بيتحاكى بيها .. ومات مننا الي مات – ربنا يرحم الجميع ونحسبهم شهداء ولا نزكي على الله احدا – وفضلت صابر وساكت ومرابط لحد ما ربنا حققلك جزء من النصر .. تعمل ايه بقه .. تكمل وتحترم حق ودم الناس الي ماتت ولا تسلمها للبهوات يركبوا عليها ويدلدلوا وتقعد تعوي وتعيط وتقول الثورة بتضيع بتضيع .. هو حد يعمل العبط ده برضه .. لكن انت رقصت وكلنا رقصنا يا صاحبي احنا افتكرنا اننا خلاص طلعنا بقه نص السلم والحياة تمام والجيش والشعب ايد واحدة وخلاص هما يكملوا بقه احنا هنعمل كل حاجة لوحدنا .. وبعدين فجأة

طااااااخ .. انت اتخبطت على السلم .. لان الي فوق مش عاجبه طلوعك بس هو مضطر يقبله عشان انت وسيلته لتحقيق الغاية الي كان بيحلم بيها .. هو مش شايفك يا صاحبي هو شايف دوشة وزحمة وشايف انك جاي وعامل قلق .. يبقى هيسيبك لحد ما تقرب وبعدين يخبطك بيادة تنزلك تاني من مكان ما جيت عشان تعمل كل حاجة من اول وجديد لحد ما هو يخلص الي وراه .. اما اللي تحت بقه فا بطلوا يسمعوك من زمان .. اعذرهم اصل سمعهم تقل اوي .. وانت السبب .. اصلك لما طلعت نص السلم كنت لازم تاخدهم معاك .. لكن انت قولتلهم خليكم بقه .. اقعدوا هنا وانا هجيب حاجة من فوق وراجع ..فضلوا قاعدين مستنيينك كتير .. لا جبتلهم عيش ولا حرية ولا عدالة اجتماعية .. وهما ما يعرفوش ان في حد فوق بيرتبلك المزحلق عشان تدلق .. انت ما قولتلهمش .. انت قولتلهم ان الي فوق والي تحت ايد واحدة ورقصتهم معاك على اول السلم .. مستني منهم ايه لما تقع .. ولا حاجة يا بيه .. خلص الكلام .. اقع وادلق ولا موت حتى ولا هيتهز فيهم شعرة .. خلاص .. بح .. هتنزل على جدور رقبتك ولوحدك لانك ببساطة ممكن ما تلاقيش حد منهم اصلا .. هما زهقوا من رقصك الي مش جايب همه وهيروحوا على سلم تاني فيه ناس بترقص بلدي وناس بترقص افرنجي وناس بترقص بما لا يخالف شرع الله !!

يارب لا تجعلنا ابدا ممن رقصوا على السلم .. فلا خدوا دنيا ولا اخرة .. ولا خدوا غير كسر رقابيهم .. يااااااارب

انت مين ؟؟

هي المشرحة ناقصة قتلا يعني عشان تيجي انت كمان وتعملنا مدونة ؟؟ يا شيخ طيب انت مين كده عشان تعمل مدونة ومين هيعبرك ويقراها ؟؟ يا اخي لماذا بالعامية المصرية فلتدون بالعربية افضل

طيب اولا انا عادي .. حاجة كده زيك وزيها وزيهم .. واحد من 60 مليون واحد تحت سن ال 40 سنة .. اسمي ميسره وصنعتي مهندس .. عندي شوية حاجات بحبها من ضمنها اني بحب ساعات اكتب .. اكتب ايه بقه اي حاجة مش فارقة .. ان شاء الله شوية هرتلة زي الي انت تاعب نفسك وبتقراهم دول

المدونة يا سيدي عشان احط فيها الحاجات الي بحبها .. حاجات كاتبها او حاجات كتبها غيري .. وبعدين اهو شباك الواحد يبص منه من سجن الحياة .. عادي يعني

التدوين بقه بالعامية ساعات بيبقى ممتع .. صحيح انا انسان بحب الفصحى جدا وبعتبرها اللغة الام والاب .. لكن العامية بتبقى اقرب اوي للفهم .. واقرب ليا انا شخصيا .. بس ما يمنعش يعني ان الفصحى مكانها محفوظ وموجود برضه

الباقي بقه هتعرفه لو حابب تقعد هنا .. اهلا وسهلا بيك .. لو مش حابب .. يبقى انسى انك جيت ودوس على اي لينك يطلعك من هنا !!