عايز اروح ..

(هذه الحاجات تخاريف شخصية .. محدش يسألني معناها ايه عشان انا كمان مش عارف)

عايز اروح .. اه عايز اروح .. قرفت من الغربة ..

طبعا كل الي بيقروا الكلام ده فاكرني اتجننت .. والي مش عارف اي اخبار عني اليومين دول يفتكرني سافرت

لا .. لا اتجننت - لأني مجنون اساسا - ولا سافرت - هروح فين يعني -

بس انا فعلا عايز اروح

اصعب نوع غربة انك تبقى في غربة وانت في بلدك .. واسوأ نوع غربة هو غربة المكان الي بتقضي فيه اكتر من 9 ساعات يوميا

الا وهو الشغل

كتير مننا - اذا ما كانش كلنا - ما بيشتغلوش الشغل الي بيحبوه .. واغلبنا برضه ما بيشتغلش عشان يثبت نفسه ويحقق نجاحات في مجاله وجو ابراهيم الفقي ده -الله يرحم امواتنا جميعا - الغالب بيشتغل عشان المم .. البرادس ولا مؤاخذة ..

ايوه الفلوس هي الي بقت اهم في الشغل .. تسأل اي حد عن شغله يقولك " شركة محترمة بتقبض الناس في مواعيدها وما بتاكلش حقهم في فلوس " هو ده بقه مقياس الشركة المحترمة بس ؟!! يعني معنى كده ان ورشة عم عادل النجار - الي في اخر احمد عرابي - تبقى اكتر الشركات احتراما عشان بيقبض الناس يوم 2 في الشهر بالمللي وبقاله عشرين سنة ما اتأخرش عن اليوم ده حتى لما والده توفى

محدش بيبص للاحترام في الشغل على انه احترام نظام شغل .. احترام قدرات وامكانيات الشخص .. احترام اسم المكان .. احترام انك مدير وكبير وربنا هيسألك في يوم من الايام على الي انت عملته في الكائن الي شغال تحت ايدك ده .. ليه معيشه طول فترة شغله في ضغط انه هيمشي وانه وحش وان طريقته في الشغل مش عاجباك و .. و .. و .. واملى الفراغ بقه بأي سخافة ممكن تتخيلها

ليه تحسسه انه ولا حاجة من غيره .. ليه لما سيادتك تغيب عن المكان وترجع تلاقي كل حاجة تمام ما تفرحش انك عرفت تربي ناس تشيل مكانك وتسد وجودك وتعتبر ده نجاح ليك .. هو لازم الدنيا تبقى واقفة عليك عشان تحس انك شخص ناجح ومطلوب يا اخي ؟!!

هتقولي النظام في مصر كده .. هقولك النظام ما بيتغيرش الا لما انا وانت وهو وهي يغيروا من عقليتهم الخربانة ان الدنيا لو ما وقفتش عليا ابقى انا فاشل ومدير مالوش لازمة !!

بلاش دي .. عارف لما تعمل حاجة مفيدة في حياتك هتحس انك بتعمل انجاز .. ولما تعمل انجاز هيبقى عندك دافع انك تعمل انجاز تاني .. وتالت ورابع .. مش انت وبس الي هتستفيد ماديا وهتستفيد بإحساسك انك بتعمل حاجة بتحبها .. المكان الي انت فيه هينجح ويستفيد .. لكن لما تعمل انجاز والتاني وتلاقي نفسك محلك سر .. واحساسك ان حتى التقدير المعنوي البسيط مش موجود .. وتحس ان الي فوق ده مش هامه غير انك تفضل تلف في الساقية لحد ما تقع ويجي تور غيرك يلف !!

هو ده الاحساس بالغربة بجد الي بيوجع نفسية الواحد .. خلاص بقيت تشتغل لمجرد انك بتقبض مرتبك اول الشهر .. مفيش حاجة اسمها هدف .. ولو عايز تترقى فا انت عايز كده عشان لما اسمك يكبر فلوسك هتكتر .. الاستهلاكية يا سيدي هي عنوان المرحلة .. حتى الشغل بقه استهلاكي وبس .. الشغل كله بقى اكل عيش .. اروح الصبح وامشي بالليل واتقرف في عيشتي عشان اجيب اكل وشرب لبيتي .. وبعد كده افكر في الشقة والعربية .. وبعد كده افكر في الساحل ولا مرسى علم وهجيب شاليه للاولاد ازاي .. وبعد كده افكر ازاي هدفع مصاريف المدراس الانترناشونال .. وبعدين مصاريف الجامعة الخاصة .. وتصحى الصبح في يوم تلاقي نفسك ما عملتش لنفسك اي حاجة غير المرض والهم والعجز البدري و  فلوس هتسيبها وانت نازل .. وانت عارف اننا كلنا نازلين تحت ..

عايز تعمل الحاجة الي بتحبها حضرتك .. يبقى لازم تتنازل شوية ..

وانا قررت ان مع اول فرصة هتنازل عشان اروح ..

لاني مش عايز ابقى مجرد تور في ساقية

لاني مش عايز اعيش في غربة تجيبلي المرض والهم .. واصحى الصبح من النوم على تحت من غير حتى ما اعرف انا جيت في ايه ومشيت في ايه

 بس خلاص ..

قانون مطرح ما تحط راسك .. حط رجليك

قانون مطرح ما تحط راسك .. حط رجليك

( تعريف بالقانون :حسب المبدأ العام .. القوة فوق العدل .. الله يرحمك يا عم سعد)

حاشية : في يوم التاسع منه سعت 1500 امر مولانا شيخ البلطجية بتطبيق هذا القانون على الرعية والي مش عاجبه يا يهاجر .. يا يخرس ويتقلب ولية ..

مادة 1 : اذا كنت الدنيا قد اصبحت غالب ومغلوب .. وساعات غالب بس .. فقد اصدر مولانا شيخ البلطجية قرارا له قوة القوانين .. يحاسب فيه المخطئين في حقه ..  ويعاقب به المتواطئين .. مع اعداءه بس طبعا

مادة 2 : اذا كنت عايز تعارض عارض مفيش مانع .. بس ما تزعلش من الي هنعمله لاننا مش هنهتم بمعارضتك نهائي

مادة 3 : نتيجة الانتخابات هتبقى على مزاجنا .. خروقات بقه مخالفات بقه اي كلام من الحمصي ده ما يفرقش معانا

مادة 4 : هنحاكم الناس في محاكمنا لو عارضونا .. لو ما احترموش قرارتنا و لوايحنا ونظامنا حتى لو مش مننا..اما لو سرقوا او قتلوا او قطعوا طريق فا هنسيبهم للقضاء العادل يحاسبهم بمعرفته

مادة 5 : هنعمل هليلة على اي حد بيقولنا تلت التلاتة كام بس يبقى من رعايا مصرونيا .. اما الي مش رعايا في مصرونيا هنركبهم طيارة وبلدهم اولى بيهم

مادة 6 : هنضرب عليك نار ونسحلك ونعريك ونكشف على البنات وبعدين نعمل فيديوهات متلفقة وعبيطة ولو هتقتنع اهلا بيك ولو مش هتقتنع طز فيك

مادة 7 : هنعمل معاك حوار ونعرف وجهة نظرك .. وبعدين نعمل الي احنا شايفينه صح –مش مهم يبقى صح لمين-

مادة 8 : ممكن تقول رأيك في الجرايد والمجلات والقنوات الفضائية واحنا كمان هنقول رأينا بقفل الجرنان والقناة ومصادرة اعدادهم وبرامجهم .. مش هي دي حرية الرأي برضه ولا هو حلال ليك وبس

مادة 9 : هتعارضنا هنكفرك .. ومش بإيدينا .. مشايخنا هيقوموا بالواجب

مادة 10 : هنسيبك تترشح للانتخابات وتعمل دعاية ولقاءات .. وبعدين نقول لكل الناس ان امك امريكانية هو انت هتنكر .. ومحدش هيفكر غير انك كداب ومخادع واحنا غلابة ومش عارفين حاجة

مادة 11 : هنتحالف معاك وقت ما تنفعنا ونسيبك تسيطر وبعدين لما تتعدى حدودك هنهبدك حكمين يجيبوا اجلك

مادة 12 : هننفخ البلالين ونشوف ناوي على ايه .. لو البلونة جابت معاك هنسيبك تلعب بيها لحد ما ننفخ غيرها .. ولو ما جابتش معاك هنفرقعها وننفخلك غيرها

مادة 13 : هنحل ونربط زي ما احنا عايزين .. ليك شوق في حاجة ؟؟

مادة 14 : الفلوس الي تخصنا دي بتاعتنا لوحدنا .. هتفكر تحاسبنا .. هنطلعلك القديم والجديد والبلد دي مافيهاش حد مش ملطوط

مادة 15 : احنا الي عملنا محبس البنزين والسولار والعيش والبوتجاز والسكر والرز وشيلنا يد المحبس معانا ..هتمشي عدل هنفتح المحبس .. هتتعوج علينا الحنفية هتتقفل واحتمال نطبب الخط خالص لحد ما تتعدل

مادة 16 : هتنزلنا الشارع بشماريخ هنسيبك .. يومين تلاتة وهتيجي في حتة ضلمة وهنخلص منك خالص

مادة 17 : هنديك مواعيد ونخلفها .. مات منك مية ولا متين .. نديك مواعيد تانية .. ولو اتخرنا شوية مش هتفتح بقك .. عشان الراجل بتاعنا هيعرف يخليك عميل وخاين وجاسوس و بلطجي وحشاش ..والبركة في المصطبة الفرعوني

مادة 18 : هنعين بمزاجنا ونقيل بمزاجنا .. المعايير والكفاءة دي حاجات تحطها في .. ايدك .. اه

مادة 19 : يعاقب بالحبس المشدد كل من يفكر في معارضة اي بند من البنود عاليه

مادة 20 : القانون ده مش هيتنشر في جرايد رسمية لأنكم كلكم عارفينه .. وهيفضل ساري الى ان يقضي الله امرا كان مفعولا

قانون الاستك منه فيه !!

( تعريف بالقانون :من ساعة ما سعيد صالح قالها وهي بقت مذهب حياتي عند كتير من سكان العزيزة مصرونيا )

حاشية : انه في يوم مهبب بستين هباب امر شعبنا المفدى بتطبيق القانون ده على مصرونيا والناس ما صدقت !!

مادة 1 : بناء على المرسوم يد  4 كب الف 2 لسنة خمسة الاف قبل اي حاجة تحبها (ان شالله قبل الكمين ) من شعبنا المفدى صدر قانون الاستك منه فيه ويتكون القانون من بنود وعكسها تستخدم حسب شدة الاستك

مادة 2 : الي ما تحتجش وشه بكرة تحتاج قفاه

مادة 2 (معكوسة) : انا ما بعرفش اعامل البني ادم بوشين (اعتبر القفا وش برضه)

مادة 3 : لو لك عند اللامؤاخذة الكلب حاجة ( ولا مؤاخذة ليه ما خلاص) قوله يا سيدي

مادة 3 (معكوسة) : الكلب لو هوهو اوعى ترد عليه (مش كان يا سيدي من شوية!!)

مادة 4 : النبي وصى على سابع جار والجار اولى بالشفعة برضه

مادة 4 (معكوسة) : صباح الخير يا جاري انت في حالك وانا في حالي ( لا يا شيخ !!!!)

مادة 5 : القرش الابيض ينفع في اليوم الاسود

مادة 5 (معكوسة) : اصرف ما في الجيب يأتيك ما في الغيب

(طيب انا هسيب الجيب موارب ينفع)

مادة 6 : احنا زارنا النبي

مادة 6 (معكوسة) : قال يا قاعدين يكفيكوا شر الجايين (لا مش هعلق )

مادة 7 : على قد لحافك مد رجليك وكل برغوت على قد دمه وما تنساش تبص على قدك

مادة 7 (معكوسة) : ان عشقت اعشق قمر وان سرقت اسرق جمل (ياعم عيب بقه)

مادة 8 : لبس البوصة تبقى عروسة  

مادة 8 (معكوسة) : القرد قرد ولو لبس خلخال بياقوت (هو الواحد لو قبح هتزعلوا ؟)

مادة 9 : دلق القهوة خير

مادة 9 (معكوسة) : دلقوا القهوة من عماهم قالوا الخير جاهم (!!!)

مادة 10 : زمار الحي ما بيطربش

مادة 10 (معكوسة) : غنيوة جاري بلسم وغنيوة البعيد علقم

مادة 11 : اذا التزمت بالمواد العادة لوحدها تعاقب بالعزل والوحدة والالتزام والنفاق واذا التزمت بالمواد المعكوسة لوحدها تعاقب بالتسيب والاهمال والانتهازية وسواد القلب .. لازم تلتزم بالقانون كله

مادة 12 : ينشر القانون بالجريدة الرسمية ويطبق من ساعة نشره حتى قبل ما ينشف

مادة 13 : كفاية كده انا صدعتك

ولو حد بقه عنده مواد تانية انا ما اعرفهاش يساعدنا الله يباركله :)

العيار الي ما يصيبش .. يدوش

خش عليا بقه يا ابو صدر واسع ..انت فاكرني هتفلسف عليك و اقولك ان كلامك غلط وانه ما بيدوش .. بالعكس .. ابسلوتلي .. انا معاك وموافقك ان العيار الي ما بيصيبش بيدوش !!!

العيار الي ما بيصيبش لازم يدوش معلوم طبعا .. بس في فرق في الدوشة الي يقصدها المثل وهي الدوشة المستحبة شبه " الصيت ولا الغنى " يعني تعمل قلق عشان صوتك يتسمع حتى لو ما وصلتش للي انت عايزه .. وفي هذه الحالة يبقى كله تمام وميت فل وتسعتاشر

لكن العكس بقه لو انت طلقت العيار عشان نيتك انه يصيب و عمل الدوشة بس يا عيني مش الدوشة المطلوبة الي انت عايزها .. بالعكس عمل دوشة استفاد منها واحد تاني غيرك بمنتهى الصياعة واللؤم عشان انت غلبان وعامل نفسك دوشجي قديم

مش فاهمني ؟؟ طيب تعالى اضربلك مثال ..

مثلا في ذات مومنت لما تلاقي حواليك عالم غلابة – عل حسب ما انت كنت فاكر- مداس على دماغهم طول تمانين سنة من الزمان .. كل يومين سجن ومعتقلات وتعذيب وقطع عيش وقفل شركات ومصادرة اموال الخ الخ .. تقوم انت يا غلبان يا محمل بأفكار ثورجية نقية ونظيفة ونفسك ترفع الظلم عن المظلومين وترد كيد الظالمين تلبس هدومك وتكتب يفط وتمسك شعارات وتجرح حنجرتك عشان تهتف برفع الظلم .. وتاخدلك في السكة عصايتين مقشة على دماغك ولا مانع من بعض السحل غير انك تبقى زبون مستديم على امن الدولة ويبقى ملفك مزنهر عليه بالبنط الاحمر العريض "يساري ذو افكار هادمة للمجتمع " وتتحارب في اكل عيشك برضه يبقى انت ضربت العيار غلط يا معلم

نيتك كانت صافية وسليمة وهدفك ان العيار يصيب نن عين الي خلفوا الظالم المستبد .. لكن تعالى معايا ذات مومنت تانية برضه وبعد سنين قليلة من العمر تقف في طابور الانتخابات تناقش مع الناس ليه انت مش عايز البرلمان يبقى كله من السادة الافاضل – الي سيادتك ضربت العيار عشان ترفع الظلم عنهم اوعى تنسى – لأنهم مش هما وبس الثورة .. والبلد لازم يكون فيها تعددية لمصلحتنا احنا كشعب ..  وتفاجئ بواحد من الناس يقولك بعلو صوته

" الناس دي شافت ظلم كتير اوي واتحاربت .. كنتو فين انتو يا يساريين ويا ليبراليين لما كانوا الاخوان بيترموا في المعتقلات "

البس يا معلم عشان ورانا مشوار .. اديك ضربت العيار .. بس لأنك كنت بتعمل كده لوجه الله تعالى وما فكرتش انك توصل برضه صورة الي انت بتعمله ده بره نطاقك الضيق لنطاق واسع من الناس عشان يعرفوا قيمة الي انت بتعمله .. وما تقوليش اصل انا نيتي كانت رفع الظلم وبس ..الكلام ده تقوله لو انت في خناقة فتوات في حارة كل واشكر .. يا راجل دا الفتوات لو واحد فيهم رفع زلطة بأيده كان بيمشي عياله تلسن وتركب على ودان اهل المنطقة تعرفهم ان البيه الفتوة رفع زلطة من سكة البهايم..وتلاقي مصمصة شفايف واهات ودموع وشجن وحاجات من الي قلبك يحبها  .. لكن في السياسة انت ساقط اعلاميا وساقط شعبيا مش عارف توصل للناس.. دي الحقيقة وما تزعلش مني انا بحبك .. اللهم الا شوية وجوه كانت بتعرف تعبر عن نفسها كويس وهي برضه – اه والله زي ما بقولك – نقية ونظيفة من جواها جدا بس هي عارفة اللي فيها

وذات مومنت تانية برضه لما تيجي تقول –بعد فوات الاوان- انا عملت وسويت ووقفت وساعدت تلاقي الي بيقولك .. لولا احنا ما كان في ثورة ولا كانت كملت الثورة دا احنا الي حميناها ولبسناها وسرحنا شعرها كمان .. انتو فاكرين ان شوية الهتاف والعيال الي طلعت يوم خمسة وعشرين دول كانوا هيعملوا ثورة !!

والجميل بقه ان كل الشعب بيصدق .. اه ما هو غلبان ياعيني .. (جوبلز) وزير اعلام هتلر اكتشف القاعدة دي زمان وكان بارع فيها وكل اباطرة السلطة مشيوا وراها .. قاعدة ميكافيلي العظيمة ..

دعهم يفعلون ما يصنع لك المجد ثم اقفز فوق اكتافهم حتى لا يرى الناس سواك .. ولا تقلق ان اوهن الذاكرات واضعفها هي ذاكرة الشعوب

شفت العيار طاش ازاي ودوشته راحت لغيرك .. انت كده عامل زي – واعذرني في المثال – الخدامة الشاطرة في سرايا كبيرة ..  الي بتنفض البيت حتة حتة .. وتلمع وتوضب وتمسح وتكنس وتيجي للست كبيرة الخدامات .. تقولها

" كله تمام يا ابلة الشقة بقت زي الفل بس الكنب واطي وتحتيه شوية تراب كتير مش عارفة ألمهم فا لميت الي على الجوانب بس" تقوم الابلة هانم اول ما تقابل ستها المصونة تقولها بمنتهى الصفاقة

" والله يا ست فوقية دا انا طلع عيني في البيت "

لا وتزود عليها كمان

  " دا حتى البت فكيهة كل لما تيجي تكنس التراب تحت الكنب ما تعرفش .. اشيل انا الكنب واجيب البت سماح بنتي تلمه معايا  "

وطبعا الهانم ضروري هتصدق .. ما الابلة خبرة وقديمة وياما اتبهدلت وبعدين الكنب تقيل وواطي والجناب الي باينة نظيفة برضه ..

عارف لما تبقى في شغلك عامل زي النحلة ما بتقعدش وعندك مشكلة صغنونة اوية قاااااااااد كده – شفت صغنونة خالص- في انك ما بتعرفش تعمل من الحبة قبة .. ما بتعرفش على كل مشكلة تتصدر في الهايفة وتعمل نفسك بطل همام حليت المشكلة برغم ان اي عيل صغير معدي في الشارع ممكن يحلها وتلاقي نفسك واقع في ارابيز مدير هوايته التضخيم والتعظيم وتكتشف انك فجأة وذات مومنت برضه – معلش كترت وبوخت مني- ظهرت بمظهر المهمل الكسول الي ما بيعرفش يعمل اي حاجة ومالوش اي شغل - رغم ان في قواعد بتطبق في اماكن محترمة تبين للناس شغلك من غير ما تعمل اراجوز مولد المطراوي عشان يبان- تبقى دي للأسف مشكلتك .. وما تقوليش المجتمع جاهل والناس يهمها المظاهر والافلام دي .. الطبيعة البشرية يا صديقي كلها تحب الابهار حتى ولو كان مزيفا 

عيارك يا معلم خليهولك لوقت الضرب فيه له لازمة .. ولو جه الوقت المناسب للضرب .. لم الدنيا كلها حواليك وعرفهم انك هتضرب العيار .. ونشن كويس اوي .. اضرب العيار .. لو صاب خير وبركة واديك عملت الي انت عايزه والناس عرفت انك الي ضربته

اما بقه لو ما صابش وعمل دوشة .. يبقى انت اولى بدوشتك .. ولا ايه ؟؟