تنويه بسيط .. وقبيح

طيب برضه انا اسف ومحدش يزعل من فلتان لساني - المعتاد مؤخرا -
اي واحد بيعقد مقارنة ما بين ما كان يحدث ايام المخلوع المحروق في جهنم بإذن الله حسني مبارك وبين ما يحدث في ايام مرسي اقوله حمرا .. حمرا عشان في ثلاثين سنة مصر اتجرفت من كل حاجة .. اتجرفت من الخبراء والعلماء والناس اللي بيحبوها وبيحبولها الخير .. استبدلنا الافواه المحترمة والي بتقول كلمة الحق بشوية المطبلاتية السفهاء ولاد الكلب الي عملناهم زعماء وهما احقر من احقر برغوت بيتنطط على رقبتك .. دمرنا كل حاجة حلوة كانت موجودة في البلد دي حتى احساس الناس بكوارثهم وهمهم .. استبدلنا الدين الصحيح القويم بتدين ظاهري سافر يا بعلمانية كاملة سافرة .. اقوله حمرا لان بلدك لا تمتلك عقلية الحفاظ على الكفاءات ولا عقلية النهوض بالبلد دي يوم واحد .. انت تعيش يا عزيز المواطن المخرق في بلد وقود محركها الزيت والسكر .. انت تعيش في بلد لم يكن يحكمها انضباط الامن ولكنه كان كان انضباط الخوف من القمع والذل والسحل .. احنا اتحولنا الى شوية منبطحين بنرضى بأقل القليل وبنخاف على مؤخراتنا الي كبرناها في قعدة القهاوي والكاف

يهات من زوال النعمة وقعدنا نتحسر على الغرب الفاجر الفاسق الي بقه متطور ونظيف ومحترم .. تنازلنا عن ادميتنا في مقابل ان عيالنا تعيش وفي الاخر عيالنا مش عارفة تعيش .. لو كان مرسي اقال وزير ووجه تعازي ولم يحاسب المسئولين الحقيقين حتى الان ودي مشكلته ولازم يحلها يا هيحصل الي قبله .. فإن العاهر السافل ابن الكلب احتفل في مدرجات استاد القاهرة بغرق 1500 مواطن مصري وتحولهم الى طعام للاسماك .. احتفل بإحتراق مئتين شاب وفتاة في حريق مسرح بني سويف .. ولما حفيده العزيز مات قلب البلد محزنة وانشأ تسع مؤسسات خيرية من مال ابنه البكري الي سرقه من الشعب بالسمسرة والعمولات .. اذا كنت شايف ان الحال ما اتغيرش لا الحال اتغير .. انا وانت فهمنا وبدأنا نتكلم وبدأنا نفكر .. حطينا رجلينا على اول طريق الوقفة من الانبطاح و شغل النعام .. ومفيش كائنا من كان مش هيتحاسب حتى ولو رئيس الجمهورية .. حتى لو راح فيها زي وزيك كتير .. بس لما نروح احنا على الاقل ممكن عيالنا ما يروحوش فطيس بكام جنيه وكلمتين نعي في الاهرام
الرئيس الي انتخبه الشعب محمد مرسي .. اما التطهير والنظافة والنهضة الي بجد مش نهضة المرشد و رئيس الحكومة الخانع العاجز عديم الدم .. يا اما الرحيل الى مزبلة التاريخ بجوار سلفك القذر ..

اللهم بلغت .. اللهم فاشهد

عن حكومة العجزة اتحدث ..

انا اسف له بس مش قادر

لما تبقى حكومة الاوساخ الي اقل كلب فيها بياخد مبلغ وقدره عشان يقوم بدوره الي اقسم عليه قدام ربنا .. وانا ارعى مصالح الشعب يا سيادة رئيس الكلاب الوزراء .. يعني واجبكم رعاية الشعب ومصالح الشعب من اصغر واحد لأكبر واحد .. يعني لما تحصل كارثة زي دي يا كفرة المفروض تدفنوا بالحياة لو احنا في بلد محترمة لكن لما تبقوا ولاد كلب جبلات وبتهزوا مقعداتكم المترهلة عشان استقالة وزير مايسواش وتعويض 5 الاف جنيه !! 5 الاف جنيه يا كفرة يالي ما تسواش شعرة من عيل من الي ماتوا جثثكم الخربة و ضمايركم الميتة القذرة .. يبقى سعر كيلو اللحمة ب 80 جنيه وسعر كيلو البني ادم 100 جنيه .. انتوا لازم تتعدموا في ميدان عام الاول وبعد كده نبقى نشوف نحاكمكم ازاي .. سيادة الرئيس محمد مرسي .. الفسدة كلهم لازم يمشوا .. انت اقسمت وفتحت صدرك وقولت انا رئيس كل المصريين .. يا تبقى رئيس كل المصريين وتحافظ على كل المصريين يا تستقيل انت كمان وتسيب غيرك يعرف يحميهم

العطشان وشركاه .. ليمتد

مساء الخير عليك عزيزي الزائر .. مرحبا بك في هايبر ماركت " العطشان وشركاه ليمتد " حيث تجدون ما يسركم جدا .. وما لا يسركم برضه .. انت وظروفك برضه !!

القسم الاول عندنا في الهايبر هو قسم الرجولة .. وهو قسم يقتصر على الرجالة فقط .. الرجالة بجد .. الرجالة وبس..يعني اي نوع من انواع الطفولة المتأخرة او المن.. مشيها المنشحة .. والعـ .. ما علينا .. مش هتلاقيه موجود عندنا في هذا القسم .. هتلاقي ورقة (نأسف هذا المنتج غير متواجد لدينا ) منورة قدامك في مدخل القسم

لو انت دخلت عندنا عزيزي الزائر هتلاقي ارفف كتير .. ارفف شهامة من انواع مختلفة .. ارفف مواقف من انواع مختلفة .. هتلاقي برضه منتج اسمه (صاحب معاك في كل وقت ) هتلاقي مجموعة من النماذج البشرية الرجولية بمختلف الاحجام والاطوال .. نماذج عمرها ما هتتخلى عنك وتسيبك حتى لو انت غلطان ..!!

قصة الغلط بتاعك او لا دي مش متوفرة هنا .. الاوبشن عند العطشان وشركاه اننا معاك حتى لو انت غلطان ..هنقف جنبك ونساعدك ونبقى في صفك حتى لو انت غلطان .. بعد كده ممكن نــ .. نعمل فيك الي احنا عايزينه بس لما مشكلتك تخلص .. وممكن المنتج ينفجر لوحده وما يبقاش موجود .. بس انت اشتريت فا هتاخد حقك يا زبون وبعدين نبقى ناخد حقنا منك في خدمة ما بعد البيع ..

القسم الي جاي على الشمال ده عزيزي هو قسم اللحظات الحلوة .. وده شئ معروف ومحبوب جدا من زبائن العطشان وشركاه مهما اختلفت اعمارهم واهتماماتهم البشرية .. العطشان وشركاه دايسين معاك في اي مصلحة حلوة.. حتى لو كانت لحظتك قعدة على الانوار وبولتين كوتشينة .. اي فرحة في الدنيا هتلاقيهم زايطين معاك في الزيطة فرحك يا عزيزي هيبقى مختلف ايا كانت مناسبتك .. اي لحظة ممكن تفرح فيها لازم تلاقي العطشان وشركاه جنبك والفرح بيهم يزيد ويكبر ويحلو .. الكونسبت عند العطشان وشركاه يا جماعة .. عايز فرح خد ..عايز بهجة خد ومن غير حدود .. الله .. ده بسكويت يا اخوانا

اما بالنسبة لمنتجات الدعم المادي فا هي موجودة .. وزي ما الكراسة الصفرا تشهد هتلاقي يا صاحبي

واحب اقولك ان القسم ده اربعة وعشرين ساعة سبع ايام في الاسبوع .. يعني عمرنا ما هنقفل ولا هنعطل

وقاعدتنا واضحة وصريحة .. الزبون دايما على حق  

القسم الي بعده قسم اللحظات المرة .. في رف هنا اسمه الدعم المعنوي .. وده عليه منتجات متوفرة معاك منذ اللحظة الاولى وحتى اللحظة الاخيرة .. حتى في اللحظات الي تبان ليك تافهة وبسيطة .. دعم انهيار عاطفي تلاقي..انهيار اسري تلاقي .. واضفنا مؤخرا خدمة الحوادث الطارئة والمفاجات السيئة .. تتوفر بقه كمان خدمة الدعم المادي وقت الزنقة .. دي من اهم خدمات هذا القسم مقدمة لكم من العطشان وشركاه

القسم الي بعديه ده قسم مخصص للسيدات .. لكي يا سيدتي هتلاقي كل العواتف -  ايوه العواتف بالتاء- الي انتي محتاجاها .. هتلاقي ارفف للحب العذري والحب الافلاطوني والحب الحقيقي بيعيش يا حبيبي وكمان هتلاقي ارفف للحب القيسي – نسبة الى قيس مجنون ليلى – والحب العنتري – نسبة الى عنتر ما تتعبنيش معاك – زي كمان ما هتلاقي ارفف للحب الكازانوفي – كل يوم حب بس حب لليوم وبس – والحب الفالنتيني – الحب الغير برئ بالمرة- وانتي واختيارك حضرتك .. لو اخترتي اي نوع من الانواع الي قبل الكازانوفي سوف تمتلكين القسم ويغلق بالضبة والمفتاح اما بقه لو اخترتي القسمين التانيين فا ده اختيارك .. وما ترجعيش تقولي ضحكنا عليكي .. هذه المنتجات غير مضمونة ومضروبة ..

تنويه هام : تم اغلاق هذا القسم بعد تمليكه لناس كويسين ربنا يجعل كلامنا خفيف عليهم

الي مش هتلاقيه هنا عزيزي الزائر هي اقسام الغش .. اقسام اللعب على كل الحبال .. اقسام النشاط النفاقي ..اقسام الادب المضروب

هذه الاقسام عزيزي الزائر غير متوفرة في محلاتنا .. احنا ناس مكشوفين وواضحين زي الميه .. وماحدش له عندنا حاجة من الاخر

تعليمات هامة من الادارة

البيع ليس نقدا ولا بالتقسيط ولا بطاقات الائتمان

كله بالحب وبس يا صاحبي ..

كله بالحب

عصابة وليد طلعت

طبعا اول ما قريت العنوان حسيت انه مثير وعدائي ومسروق من فيلم عربي و ....... بلا بلا بلا – هراء يعني لا مؤاخذة – بس من الاخر هو ده العنوان المناسب الي جه في دماغي ومش هغيره عشان دعاة الابتكار والتجديد والتنوير وشغل الهشتكة ده .. اديني في الهايف وانا احبك يا فننس ده شعارنا هنا من اول سطر لحد اخر سطر

طيب .. نخش في الموضوع .. في الشوية الجايين دول هنعرف شوية افراد وشخصيات من عصابة وليد طلعت..طبعا هنبدأ بزعيم العصابة والقائد ورمانة الميزان ومانويل جوزيه العصابة .. هو مين ؟؟ .. وليد طلعت طبعا ما تبطل غباوة يا جدع .!!

المواصفات الشكلية مش هتهمك كتير – الا لو كنتي من اعضاء نادي كيوت مان – ساعتها انصحك تدوري على اكونته على الفيس بوك وتخلصينا .. اما لو كنت مهتم تعرف المواصفات الشخصية والنفسية .. احب اعرفك عليها هنا

الراجل ده عصبي حبتين .. حمقي تلات حبات .. نمكي في تفاصيله الشخصية اربع حبات ونص .. بس فيه ميزة جميلة اوي .. ومهمة اوي .. الراجل ده قائد بطبعه .. لا مش قائد وبس .. ده طبق اسلوب جميل في قيادة هذه العصابة الجميلة وهو لسه لا يعرف حاجة عن علم الادارة ولا عن مقومات المدير الناجح في التكعيب المتوسط للمؤسسات ذات البتنجان المخلل – اي كلام من بتاع كورسات اليوم الواحد ده –

الراجل ده خدته فطرته السليمة ودماغه الي اتعود يشغلها بشكل مختلف ناحية اسلوب اسمه القيادة الجماعية للمنظومة .. زي الاسلوب كده الي بيستخدمه بيل جيتس .. اسلوب قعدة العرب زي ما واحد صاحبنا بيحب يسميه

المختصر المفيد .. الاسلوب ده بيعتمد اساسا على اخضاع كل مهارات وقدرات كل الافراد من اول قائد المنظومة لحد اصغر عيل فيها لتقوية وتنمية المنظومة ومحاولة اقناع افراد المنظومة بتصوراتك وقراراتك بشكل ديمقراطي لتحويلها الى اهداف مشتركة وليس تصورات قيادية فقط وهو ما يعرف في علم الادارة بأسلوب القائد الناعم

Smooth Boss Method

سامع صوتك بيقول " ايه الكلام المجعلص ده ما تكلمنا شعبي كده عشان نفهم " اقولك ان مثلا انت عندك فكرة وعايز تطبقها وتحت ايدك مجموعة مختلفة الاشخاص والنفسيات .. قدامك طريقتين .. يا تقول بصريح العبارة انا دماغي فيها كذا وهنعمل كذا وكذا .. وساعتها احب ابشرك انك هتفشل فشل ذريع لان اغلب الي هينفذوا الكلام ده هيعملوه كل واحد بطريقته لحد ما المركب تغرق وتسمعني سلام اني اغرق اغرق .. يا تعمل زي ما اخونا لالو عمل

هتلم افراد عصابتك المهمين او الافراد المفتاحيين الي بيسموهم في علم البناء الاداري (الكي بيرسونس) .. ودول ليهم طريقة في الاختيار .. لازم يكون كل واحد فيهم له دور مميز ويكونوا اقرب منك بشكل يومي من افراد عصابتك الاغراء وهتعمل معاهم قعدة برين ستورمينج .. او عصف الافكار عشان اخوانا بتوع اللغة .. وتقعدوا تتناقشوا وتتخانقوا وكل واحد يطلع برأي وتختلفوا وتتفقوا وفي الاخر توصولوا لي اتفاق نهائي محدد الادوار للكل ..يعني كل واحد هيبقى عارف هو بيعمل ايه وده اهميته ايه بالنسبة للمنظومة كلها .. وفي الاخر لازم تضغط اوي على نقطة ان كل تفصيلة ولو كانت صغيرة هتفرق اوي اوي في الهدف الي (احنا) عايزين نحققه .. لازم الهدف يكون احنا والطريقة احنا والوسيلة احنا ..

طيب استفدت انا ايه بقه يا عم الحاج لما عملت كده ؟؟

اولا : وصلت للناس رسالة ان مفيش انفراد برأي ولا شغل ديكتاتورية جوه اللعبة .. احنا اتفقنا كلنا ووصلنا كلنا للطريقة دي وللاسلوب ده .. مش انا وصلت لا احنا وصلنا

ثانيا : الفكرة تحولت من مخ الفرد بشكل لطيف وناعم الى قلب المجموعة كلها .. وده هيخلي كل افراد المجموعة المختلفين اساسا في كل شئ من اول الشخصيات لحد الادوار والافكار يشتغلوا على الفكرة كأنها فكرة كل واحد فيهم لوحده وبمنتهى الحب . وانت عارف القاعدة الاساسية " كله بالحب يا صاحبي "

ثالثا : الطريقة دي هتديك فرصة تصنف المجموعة كويس .. مين ينفع دوره يبقى دائم واساسي ومين دوره يبقى فرعي وغير مهم وغير ضار في نفس الوقت .. صحيح مش هتنجح من اول محاولة في كده .. بس بعد كده هتعرف كويس اوي مين بيحب المنظومة دي فعلا وعايزها فعلا .. ومين عايز المنظومة دي وسيلة لهدفه هو الشخصي..وساعتها هتعرف تقسم دنيتك وبيتك جوه عشان تعرف مين ياخد الدور المهم .. عشان ما يجيش حد في النص ويخلع وتلبس انت اسود يا معلم ..

طيب الي حكيتهولك ده عمله شاب عمره 21 سنة وطالب في كلية هندسة ما درسش في حياته اكتر من فيزيا وكيميا في ثانوية عامة .. واحتراق وثيرمو وتبريد وتكييف .. ولما حتى درس تنظيم صناعي – مادة سخيفة كده ومفتعلة- ما كانش حد فيها بيهتم بأساسيات الادارة .. يعني عمل ده بفطرة سليمة وبنظرية تحترم جدا

استخدم مخه .. فهم هو عايز ايه وحدد كويس هو بيحلم بأيه وحط خط لسقف طموحه رايح فين ..وده كان سبب اساسي في ان العصابة او المنظومة او المجموعة – سميها زي ما تحب مش هتفرق- وصلت لاحتران وحب واعجاب الناس .. حتى لو كانت فريق مسرح هواة افراده طلبة جامعة !!

نيجي بقه للاشخاص المفتاحيين او الكي بتوع الي احنا قولنا عليهم انفا – حلوة انفا دي – واذا كنا هنرغي عن الاشخاص دول بس فا دا مش معناه ان الباقي تحصيل حاصل .. مفيش فرد في اي منظومة تحصيل حاصل يا صاحبي .. اصغر مسمار رابط اصغر ترس مهم عشان المكنة تخش الخدمة وتفضل شغالة ..

ملحوظة : عرض الافراد دول هيبقى بسميات ابتكرها وليد نفسه في مشهد هزلي كوميدي في مسرحية من تأليفه شخصيا .. بس سبحان الله .. لقيت المسميات دي بجد مناسبة جدا جدا جدا .. وسامحنا بقه يا عم على الاقتباس ده

ملحوظة تانية : تتعدد الاسامي لكن الدور يبقى ثابت .. المنظومة الكويسة ما بتقفش على حد على فكرة..

رقم 1 : الخشن

الخشن ده غالبا بيبقى المكلف بالادوار القيادية الصعبة .. الادوار الي محتاجة تطبق الجزء الاول من المقولة الشهيرة (لازم تضرب وتلاقي) ده بقه الي بيبقى مسئول عن الضرب .. شوية حزم .. شوية انضباط كتير والتزام اكتر ..شوية عصبية تعدل اي حد يفكر يخرج عن الخط .. وده احتكاكه بيبقى اكتر مع الافراد .. بيبقى برة لعبة الحاجات المساعدة عشان يفضي دماغ زعيم العصابة من الجو المدرسي بتاع فين استيكتي وانا هلبس ايه وهاكل ايه

رقم 2 : الحنيين

ده بقه الي بيلاقي .. ما هو لازم يبقى في صدر حنين عشان يلم ورا عمنا الخشن .. شوية حنية مع شوية هزار وضحك وجو اسري اخوي كده عشان الجو يلطف .. وده غالبا بيبقى مهم عشان النفسيات ما تتعقدش وعشان العملية مش طالبة قفش

رقم 3 : رساوة

الاخت رساوة بتبقى قائدة الجناح النسائي في العصابة .. وهي مسئولة عن النواحي النسائية الداخلية – تنظيم وقيادة بقية الاخوات في العصابة - .. وعن النواحي الخارجية – مع المدامات بتوع رعاية الشباب وشؤون الطلاب الخ الخ-غير طبعا تنظيم النواحي المادية وظبط الاداء الفلوسي جو العصابة عشان العملية ماتخرمش

رقم 4 : عبقرينوووو

ده بقه المخ الحلو الجميل .. ده الي بيبص للفكرة من زاوية خيالية خزعبلية جهنمية .. ومالوش في التنفيذ بقه وازاي تتعمل وهتكلف ايه لان ده مش شغله ومش دماغه .. وده دايما بيبقى اكثر من شخص وبيبقى مهم جدا جدا في مرحلة عصف الافكار اياها .. ومرحلة الحاجات المساعدة زي الغنا والدعاية والموسيقى وتسويق الفكرة واللاذي منه ده

رقم 5 : السميييع

ده هو العنصر الي ممكن نسميه (ام شحاتة اللتاتة) ده العنصر الاقرب من قعدات افراد العصابة الجانبية وده العنصر الي بينور اللمبة الحمرا لما النفسيات تتعب .. او لما افراد العصابة يبقى عندهم مشاكل نفسية مستخبية جوه جوه..ده بقه هو الي بيعرف يخش جوه جوه ويعرف كل حاجة من مجرد كلمة اتقالت او بصة مش ولا بد محدش بياخد باله منها

رقم 6 : المستر مسيو

لما الفكرة بقه تحلو كده وتخش الفرن وتخرج للاكيلة .. لازم يبقى في مدرس فاهم كويس هو بيعمل ايه عشان يعرف يوصل الفكرة لافراد العصابة .. الراس دي هتحولها من مجرد فكرة لواقع وحاجة ملموسة .. الدور ده دايما بيتوزع ما بين زعيم العصابة نفسه وما بين ناس تانية فاهمة شغلها وعارفة هي بتعمل ايه في قلب المنظومة

رقم 7 : كازانوفا .. نوفا

 ده بقه النجم المحبوب .. المحبوب اوي من الجميع جوه وبره العصابة .. تقدر تقول عليه وسيلة اساسية للم شمل العصابة .. لازم يبقى كوول .. جديد .. طاقق .. وكل حاجة هو بيعملها بتتعمل تاني من افراد العصابة الي مالهمش شخصية محددة من الي فاتوا دول .. تقدر تقول عليه .. تلفزيون العصابة ووزير اعلامها

رقم 8 : العنتيل

العنتيل ده بقه شخصية مش موجودة في المشهد على المسرح يا عزيزي .. دي الشخصية الي مفيش حد من برة العصابة اصلا بيعرف عنها اي حاجة غير الاسم والشكل .. لكن ده هو اللي بيسموه الهيفي ارم .. الدراع التقيلة اوي.دي المساند الي بيقف عليها الكرسي .. بيعمل الادوار الصعبة الي في نفس الوقت اغلب افراد العصابة ما بيعرفوش يعملوها .. زي بتاع المهمات في مواقع المباني .. ده بتاع التنطيط .. المشتروات .. التنظيم .. ديكور ماشي .. اضاءة ماشي..ملابس ماشي .. كواليس وتنظيم حركة برضه ماشي .. واذا حد خستع او خرج برة الخط .. تلاقيه بيسد مكانه بمنتهى الاحترام والنظام من غير اي مناقشة .. ده الدراع الي بيسند التل قبل ما يختل يا صاحبي .. وده سبب اني ختمت بيه .. لان من غيره كل ده ولا له اي لازمة ولا ينفع ببصلة

طبعا في الاخر ما ينفعش نقفل ونمشي من غير ما امارس هوايتي المفضلة في اني اديك الزتونة .. يا تحطها حلقة في ودانك يا ترميها في صفيحة حياتك من غير اي تفكير وتريح مخك وتفكك من ميسره ورغيه

لو كل واحد فينا فكر هو ايه وعرف قدراته ايه واختار مكانه جوه المنظومة دي ورضي بيه واشتغله بذمة وحب..لو كل قائد في البلد دي او مدير او مشرف فكر في الناس الي وراه وفي المنظومة دي تكبر وتعمر ازاي ..

لو كل واحد فينا فكر في العصابة قبل ما يفكر في نفسه ..

كانت كل منظومة في البلد دي نجحت وكبرت ..

زي ما نجحت .. عصابة وليد طلعت

حقائق علمية

الزمان : شهر اغسطس 2004

المكان : ساقية الصاوي

الحدث: نتيجة مهرجان الساقية المسرحي

عارف يعني ايه ثلاثين بني ادم قاعدين منتظرين نتيجة .. مش نتيجة ثانوية عامة ولا كلية ولا نتيجة انتخابات الرياسة .. لا نتيجة عرض مسرحي كان بالنسبة ليهم حلم لازم يتحقق

لو كنت من هارموني ارجع معايا بالذاكرة لورا شوية – مارس 2003 بالتحديد – اما لو كنت مش هارموني وما تعرفهمش .. ارجع معايا برضه انت خسران ايه !!

في مارس 2003 قررت ادارة جامعة حلوان البارة الغاء مهرجان المسرح الجامعي عشان امريكا قررت غزو العراق ودي حاجة بصراحة زودت كرهي لأمريكا .. يعني تيجوا على اخر سنة ليا في الجامعة واول عرض مسرحي عملاق بالشكل ده وبنحضرله من صيف 2002 وتقولي نلغي عشان امريكا مزاجها مش رايق وقررت تنكد على صدام عيشته !!

اتخرجت .. وقعدت في بيتنا شوية حلوين .. وصحيت في يوم من النوم على تليفون بيقولي تعالى يا عم انت الكلية عندك بروفا !!

بروفا ازاي يا وليد وانا خريج .. هنتصرف يا ميسره .. طيب ولما انفع في دور ولا حاجة هظهر على المسرح ازاي وانا خريج .. يا عم قولتلك هنتصرف بطل هري ..

ويشاء السميع العليم عزيزي القارئ الصبور الحنين انك تقف ياد يا ميسره على مسرح الكلية تاني .. وانك ياد يا ميسره تروح تعرض ليلتين في ساقية الصاوي وانت لسه خارج من مستشفى كوبري القبة العسكري وضغطك 160 على 110 عشان تخرج من الجيش .. ويشاء السميع العليم انك تدخل مهرجان الساقية المسرحي وتعرض ليلة الصالة مافيهاش مكان لرجل .. لا مفيهاش مكان لصباع حتى ..

ارجع معايا تاني قدام بقه .. ايوه بص في الوشوش دي كده .. اه ده مش ممثل معانا دا ايمن صاحبنا .. وده مش ممثل دا بهاء صاحبنا .. ودي وده ودي .. كل دول مش ممثلين يا جدعان دول اصحابنا ..

طيب تفتكر ليه الناس دي كانت معانا في كل حتة ؟؟!! تفتكر ليه كانوا قاعدين على اعصابهم زينا ومستنيين النتيجة؟؟!!

تفتكر ليه مثلا الناس الي كانت قاعدة دي ممثلين وشاعر وملحن ومهندس ديكور ومخرج كانوا على اعصابهم ؟!!

تفتكر ليه الفرحة الهيستيرية العارمة – شفت الكلام التقيل – لما كل واحد كان بيحط رجله على المسرح يستلم جايزة؟!!

انا هقولك يا معلم .. مش هقولك القلب والعقل – لأن الي في القلب في القلب - هقولك حاجة واحدة بس

كان في بني ادم ابن ناس ومحترم .. جاله الضغط واعصابه تعبت سنة ونص بيجهز .. استحمل كل السخافات والمعوقات .. كان قايم بدور حمض الكبريتيك المركز مع كل معادن هارموني لحد ما كل المعادن دي دابت في قلب الحمض وبقت سبيكة واحدة .. الفضل لله سبحانه وتعالى – احسن جمال يشوف الكلام ده ويزعل مني – ثم للبني ادم ده .. البني ادم الي عصبيته وقلبه على الشغل خلوه يتجنن ويكلم نفسه كل يوم عشان الديكور والاضاءة والموسيقى والممثلين .. وخناقات ومشاكل الممثلين جوه وبره المسرح .. وارهاق البيت والكلية .. ومشروع التخرج الي كان بيتنفضله يوم الاجتماع ..

لو كل واحد فينا كان بيهمه دوره وبس .. او دوره والمشهد الي هو فيه .. او يساعد ازاي بأي حاجة .. فدا عشان قائد المنظومة يا جدعان كان مخلص في كل حاجة بيعملها .. لما تحس انت يا بني ادم ان قائد المنظومة قلبه على الي بيحصل ده وانت قلبك في الثلاجة تبقى تستاهل الحرق ..

الروح يا جدعان مهمة مفيش كلام .. الروح بتخليك تتغاضى عن حاجات كتير وتطنش حاجات كتير عشان الكيان ده يفضل عايش .. الروح برضه لو راحت .. الكيان يقع .. بس عندي ليك سؤال بالله عليك

لو قائد الكيان ده عنده الروح .. و اعضاء الكيان ده بدأت تتسحب منهم الروح وبقى مكانها اشباح كتير اسمها الانانية والظهور والتفكير في ضوائق الامور – معلش اخر مرة اقول فيها كلام تقيل – يبقى الغلط والعيب على مين ؟؟!!

عايز يبقى عندك كيان محترم .. عايزه يعيش ويفضل عايش الى ان يرث الله الارض ومن عليها

اوعى تفكر غير في الكيان نفسه .. مهما كانت الاحباطات ومهما كانت المشاكل ومهما كانت العوائق .. فكر في الكيان وبس

عشان يوم ما تقف وقفة زي وقفة الساقية دي .. وتنجح هيقولوا هارموني – او ايا كان الاسم – هو الي نجح ويوم ما تفشل .. برضه هيقولوا الكيان كله فشل ..

لو كلامي ده بالنسبة ليك كلام انشا وموضوع تعبير ثانوية عامة انساه وكأنك ما قريتوش .. لكن لو حسيت بأي حاجة مفيدة منه .. يبقى حط اخر جملتين دول جوه عقلك واضربهم في الخلاط ..

واشرب وراهم بقين ميه عشان تهضمهم كويس ..

فاهم يا عم الحاج ولا نقول تاني ..؟؟